போர் நிறுத்தம்

நான் பிறந்தபோது
போர் முடிந்தது
இறுதி ஆணைகள் சுடப்பட்டன
பீரங்கிகள் தத்தம் நிழலில்
தூக்கிலிடப்பட்டன
என் வீட்டில்
பரிசுகள் பகிர்ந்தளிக்கப்பட்டன

'முதலில் உனக்கு ஜான்
நன்றியுடன் நீயெனக்குப் பாடுபட்டதால்
எனது ஞாபகார்த்தமாகப் பொருத்துகிறேன்
ஓக் மரத்தின் உச்சரிப்பான
இம்மரக் காலை...
நலமுண்டாகட்டும்!
நீ மரித்தால் சகோதரவுணர்வோடு
மரங்கள் தாலாட்டும்
உச்சி முகரும்
உனது வலக்கரம்...?
ஞானநூல் எதையும் தொடாததால்
அதைக் கழட்டி மண்ணுக்குக்
கொடுத்துவிட்டேன் எழுதிக்கிறுக்க,'
என்றது மேசைமூலையில் இருந்த
போர் அப்பாவைப் பார்த்து

மரியா உனக்கு...
எனது குதிரைகளை உன்
கண்ணீரில் குளிப்பாட்டியதால்;
உன்னிரு மகன்களை
என் பூட்ஸ் துடைக்க
போர்க்களத்திற்கு அனுப்பியதால்,
உன்னிரு மகள்களின்
இரவுகளை நான் சுவைக்கவிட்டதால்
அட பாரேன்!
அள்ளிமுடிக்க நரைமூழ்கிய கூந்தலும்
ஆறுதலுக்கு தூக்கம்போன இராத்திரிகளும்
யாருக்காம்... உனக்குத்தான்
என்றது போர் அம்மாவைப் பார்த்து

குன்றுக்கப்பால் குடியிருக்கும்
பீட்டரின் மகனே ஜார்ஜ்...
செவ்விழியோன் என
செம்மாந்திருந்தாயே ஒருமுறை
ஒன்றென்றும் நீயும்
உன் மனைவியும்
அறுவடை செய்ய
காரிருளின் எல்லைகளை உனக்கு
உயிலெழுதி வைத்து விட்டேனே

இக்கிராமத்திற்கு!
நாற்பது அனாதைகள்
ஆறு மாதத்திற்குள்
பத்து காலியான மீதி இடிந்த வீடுகள்;
அஸ்தமனம் பார்த்த
அரைவேக் காட்டில் வெந்த வானம்
மணியற்ற கூண்டு;
தலைகீழாய் தொங்கும்
இளம்பெண்கள் எண்மரை
ஏந்திய இடுகாடு;
அண்டை வீட்டானின்
சுவாசம்போய் ஊறும்
இருபது புரவிகள்

உனக்கோ!
இன்று பிறந்த உனக்கோ!
நமக்கு முன்பின்
அறிமுகம் இல்லாததால்,
பசுக்கள் மடி வரண்டு போகவும்
பழமரங்கள் தோட்டத்தில் எரிந்து போகவும்
கிணற்றின் கண் அவிந்து போகவும் விடுகிறேன்

வானம் உனக்கு
நட்சத்திரம் ஊட்டட்டும்...
ஆண்டவன் பெயரால்
நான் ஞானஸ்நானம் பண்ணுகிறேன்.

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2010.  |  Designed by CVA | Best View in : Mozilla Firefox |  Best resolution : 1024 X 768