மௌனம் தின்னும் பொழுதுகள்

இணைக்கோடுகள் குறித்து
பேசிக்கொண்டிருந்தோம்

தண்டவாளத்தைச் சொன்னாய் நீ
பிறகு ஆற்றின் இருகரைகள்
அடிவானமும் நீலக்கடலும்
உன்னை அதிகம் விசனப்படச்செய்தது

மீந்திருந்த பொழுது முழுவதும்
மௌனம் நம்மை மென்று கொண்டிருந்தது

விடைபெறும்போதும்
பின்வந்த நாட்களிலும்
அறிந்திருக்கவில்லை
நீயும் நானும் கூட அதில்
சேர்த்தியென்று!

மீள்பயணம்

இன்றிரவும் என்னால் எழுத முடியும்
என்று தோன்றவில்லை

ஒளிப்பிரதேசத்தில் மிதந்து கொண்டிருக்கிறேன்
தேவையில்லை இரவும் பகலும்
உயிர் பிரியும் ஓசை கேட்டிருக்கிறீர்களா?

இன்றிரவும் என்னால் எழுத முடியும்
என்று தோன்றவில்லை

போதும் இந்த பரிதவிப்பு
மிகச்சிறிய உருண்டை இந்த உலகம்
உன்என் மொழி அறியாதது
பால்வீதி தோதாகப்படுகிறது
நம் மீள்பயணத்திற்கு
சகபயணி உன் வருகைக்காக
நான் முன்சென்று காத்திருக்கிறேன்

(பாப்லோ நெருடா-வின் 'இன்றிரவும் என்னால் எழுத முடியும்' என்ற கவிதை வரிகளின் நினைவில்)

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2010.  |  Designed by CVA | Best View in : Mozilla Firefox |  Best resolution : 1024 X 768