அடைமழையில்
சுற்றிய வளாகங்கள்
தங்களை ஒப்புக்கொடுத்தபடி
கொஞ்சமும் நீர் தீண்டாப்
பேணலில்
அந்த வாகனத்துக்குள்ளே
ஒரு குடும்பம்
அடைபட்டுக் கிடந்தது

கண்ணாடிக்குப் புறத்தே
வழிந்தாடும் நீரின்
ஒரு துளியை
அல்லது ஒரேயொரு குமிழியை
உடைத்துவிடும் ஆவலில்
உள்ளிருந்தே வசப்படுத்த முயன்றனர்
குழந்தைகள்

கண்ணாடித் துடைப்பான்கள்
நீரின் கன்னங்களை
வெளுத்துக்கொண்டிருந்தன

வளசையில்
பற்றியிருந்த கரங்களில்
முளைத்த கண்களில்
மழை பற்றிய கோபம்
உச்சமடைந்திருந்தது

நடைதளத்தில்
இன்று மழைக்கான நாளென
எல்லோரும் பின்வாங்கினர்

யாருடைய ஆசைகளும்
நிறைவேறாத
இந்த மாலைப் பொழுதைச் சுமந்த வண்ணம்
வீடடைந்தனர்

உக்கடை தானியக்கி
தானாகத் திறந்துகொள்ள
வாகனம் உள் வாசலில் நின்றது

குளிக்கச் சொல்லி
பிள்ளைகள்
துரிதப்படுத்தப்பட்டனர்

துளிகள் தீண்டாச்
சோகத்தோடு குளியலறையின்
மேற்குழாய்க்கு அடியில்
கண்கள் மூட
தண்ணீர்ப் பூக்கள் உதிர
பிள்ளைகள் இருவரும்
சிரிக்கின்றனர்

"மழையில
நனையிற மாதிரி இருக்குல்லே!"

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2010.  |  Designed by CVA | Best View in : Mozilla Firefox |  Best resolution : 1024 X 768