மலேசிய இந்திய அறிவியல் அறிவார்ந்த இயக்கம் (MISI) மேலும் சில அமைப்புகளோடு இணைந்து தமிழ்ப்பள்ளி மாணவர்களுக்கான அறிவியல் விழாவை தேசிய அளவில் சிறப்பாக நடத்தி வருவதை பலர் அறிவர். தமிழ்ப்பள்ளி மாணவர்கள் அறிவியல் துறையில் ஆர்வமாகவும் உற்சாகமாவும் ஈடுபட அறிவியல் சார்ந்த போட்டிகள் உதவும் என்பதை அறிவியல் விழா உணர்த்தியுள்ளது. அறிவியல் விழா அளித்த நேர்மறையான அனுபவங்களால் அறிவியல் தகவல்களை இன்னும் உவப்பானதாகவும், எளிமையாகவும், ஈர்ப்பாகவும் மாணவர்களிடம் பகிர்ந்துக் கொள்ள ஒரு இதழின் அவசியத்தை இயக்கம் உணர்ந்துள்ளது. அதிலும் தமிழ்ப் பள்ளி மாணவர்கள் அறிவியல் தமிழிலும் எளிய ஆங்கிலத்திலும் வாசிக்க தரமான மாணவர் அறிவியல் இதழ்கள் இல்லாததையும் உணர்ந்துள்ளது.

இதன் தொடர்ச்சியாக தும்பி எனும் காலாண்டு இருமொழி அறிவியல் இதழ் தமிழ்ப்பள்ளி மாணவர்களுக்காக மலர்ந்துள்ளது. தற்போது மலாயாப்பல்கலைக்கழகத்தின் இணை துணைவேந்தர் பேராசிரியர் குருநாதன், வே. இளஞ்செழியன், முனைவர் ஜி.சுப்ரமணியம், முனைவர் யூனுஸ் யாசின் போன்றவர்களின் ஆலோசனையிலும் வழிகாட்டுதலிலும், இயக்கத்தின் தலைவர் வே. சாமிநாதன், முனைவர் வெங்கடேஷ் போன்றவர்களின் மேலாண்மையிலும் தும்பி கம்பீரமாக மாணவர்களுக்காக மலர்ந்துள்ளது. தும்பியின் ஆசிரியராக எழுத்தாளர் சு.யுவராஜன் பங்காற்றுகிறார்.

தும்பி ஒவ்வொரு இதழிலும் ஒர் அறிவியல் கருப்பொருள் முதன்மையாக கொண்டு மலர்கிறது. முதல் இதழ் விண்வெளி ஒட்டிய சுவாரஸ்யமான அறிவியல் தகவல்களோடு மலர்ந்தது. இரண்டாம் இதழ் பசுமை அறிவியல் பற்றிய அறிமுகங்களோடு மலரவுள்ளது. இவற்றோடு அறிவியல் சித்திரக்கதைகள், அறிவியல் விளையாட்டுகள், போட்டிகள், துணுக்குகள், அறிவியல் பரிசோதனைகள், அறிவியலாளர்களின் நேர்காணல்கள், புதிர்போட்டி என பல சுவையான அறிவியல் அங்கங்களோடு மலரும் மாணவ இதழ் தும்பி.

வரும் 9 அக்டோபர் 2010-ல் தும்பி இதழ் அதிகாரபூர்வமாக வெளியிடப்படுவதோடு அதன் உருவாக்கத்தில் துணை நின்ற கைக்கொடுத்த நல்லுல்லங்களை பாராட்டும் முகமாக விருந்து ஏற்பாடு செய்யப்பட்டுள்ளது. பத்துமலையில் அமைந்துள்ள STC Caterers அவர்களின் மண்டபத்தில் வெளியீட்டு விழா மாலை 7 மணிக்குத் துவங்கும். இதய நிபுணரும் தமிழ்ப்பள்ளி மாணவர்களின் அறிவியல் வளர்ச்சியில் அக்கறைக் கொண்டவரும் தும்பியின் நன்கொடையாளருமான டத்தோ டாக்டர் மா.தமிழ்செல்வன் இதழை வெளியிட்டு பேசுவார். தும்பி லாப நோக்கமில்லாமல் மாணவர்களின் நலனுக்காக ஒரு அரசு சாரா இயக்கமான மலேசிய இந்திய அறிவியல் அறிவார்ந்த இயக்கத்தால் வெளியிடப்படுவதால் தொடர்ந்து நடைபெறும் விருந்தில் கலந்து தும்பியின் தொடர் வளர்ச்சிக்கு உதவ முன்வர நன்கொடையாளர்களை வேண்டுகிறோம். வெளியீட்டு தொடர்பான மேலதிக விளக்கங்கள் பெற பின்வருபவர்களை தொடர்பு கொள்ளலாம்.

நாள் : 9.10.2010

நேரம் : மாலை மணி 7.00

இடம் : பத்துமலையில் அமைந்துள்ள STC Caterers மண்டபம்

தொடர்புக்கு:

வே. சாமிநாதன் - 019-3323477
சு. யுவராஜன் - 019-3404186
பெ. வெங்கடேஷ் - 016-2639762

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2010.  |  Designed by CVA | Best View in : Mozilla Firefox |  Best resolution : 1024 X 768