இளங்கோவன் மொழிப்பெயர்ப்புக் கவிதைகள் ...13
ரஷ்ய மூலம் : சர்ஜெய் மிக்கால்கோவ் | தமிழில் : இளங்கோவன்

அடி மூடன்

குதிரைக்குப் பின்னாலும்
எருது பசுவிற்கு முன்னாலும்
கவனம் தேவை நண்பனே
ஆனால் ஆரம்பம் முதல் இறுதிவரை
அத்தனைக் கோணங்களிலிருந்தும்
ஜாக்கிரதை ஜாக்கிரதை
முட்டாளிடம் ஜாக்கிரதை

அங்கிங்கெனாதபடி
அறிவாளிக்குகந்த நாற்காலியில்
அடிமூடன் அமர்த்தப்பட்டால்
ஆழமான கண்களால் கூட
அவன் நிஜமுகத்தைக்
கிழிக்க முடியாது தெரியுமா?

சிறிது காலம் முட்டாளும்
பவிசாய் பணிவாய் பழகி
முதுகெலும்பற்ற காட்டானல்ல
தானென்று காட்டிக் கொள்ளலாம்
அழகாய் பேசி எழுதித்தள்ளலாம்
அப்பாவியாய் ஊமையாய் மேடைதோறும்
அரிதாரம் பூசிக்கொள்ளலாம்.

பத்தாயிரம் ஞானிகள் கூட
பரிசீலிக்கத் தடுமாறும் குழப்பங்களை
ஒரே வினாடியில்
உலகத்தில் உருட்டிவிட
ஒரே ஒரு
மகாமடையன் போதும் தோழனே

ஆகவே
இனிவரப்போகும் அறிவுஜீவிகளுக்கு
தத்துவம் ஒன்று சொல்வேன்

முட்டாளைக் கண்டு மிரள
முந்நூறு காரணங்கள் இருந்தாலும்
முட்டாள் நடுங்குவதெல்லாம்
முகத்திலறைந்தாற் போன்ற
நகைப்புக்குத்தான்.

சர்ஜெய் மிக்கால்கோவ்

மிக்கால்கோவின் கவிதைகளையும் பாடல்களையும் மனனம் செய்யாத ரஷ்யக் குழந்தையே கிடையாது. சிறுவர் இலக்கியத்துக்கு பெரும் தொண்டாற்றியுள்ளதோடு, அங்கதச் சுவைமிக்க கவிதைகளாலும், குட்டிக் கதைகளாலும், நாடகங்களாலும், திரைக்கதைகளாலும் நவரஷ்ய படைப்பியக்கத்தின் ஆதார சுருதிகளில் ஒன்றாகியுள்ளார்.

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2010.  |  Designed by CVA | Best View in : Mozilla Firefox |  Best resolution : 1024 X 768