அனைத்துலக தமிழ் எழுத்தாளர்களை ஒன்றிணைக்கும் மாநாடு முதல் முறையாக இலங்கையில் வரும் ஜனவரி 6,7,8 தேதிகளில் நடைபெறவுள்ளது. இலங்கையின் தலைநகர் கொழும்பில் இடம்பெறவுள்ள இந்த மாநாடு குறித்து ஏராளமான சர்ச்சைகள் இணையத்தில் இடம்பெற்று வருகின்றன. தமிழகப் பத்திரிகைகளுக்கும் உலக இணைய எழுத்தாளர்களுக்கும் வெறும் வாய்க்குக் கிடைத்த அவலாக இந்த மாநாடு அமைந்து விட்டது. இலங்கையின் தமிழ் வரலாறு என்ன, படைப்பிலக்கியப் பின்னணி என்ன, இன்று அங்கு வாழும் மக்களின் மனநிலை என்ன, இந்த மாநாட்டில் என்ன நடக்கப் போகிறது, அதன் பின்விளைவுகள் என்னவாக இருக்கும், போன்றவை பற்றி எதையுமே ஆழமாகத் தெரிந்துகொள்ளாமல், சில விஷயங்களை நுனிப்புல் மேய்ந்துவிட்டு, தனிப்பட்ட மனிதர்களைத் தனிப்பட்ட முறையில் தாக்குவதாகவும் அடிமுடி தெரியாது ஆர்ப்பாட்டம் செய்வதாகவுமே பெரும்பாலான எழுத்துகள் இடம்பெற்று வருகின்றன. இலங்கையில் மாநாடு நடப்பதால், அதை இலங்கை அரசு நடத்துகிறது, அரசிடம் கைக்கூலி பெற்றவர்கள் மகிந்த ராஜபக்சேவுக்குக் கொடி பிடிக்க இந்தக் கூட்டத்தை நடத்துகிறார்கள், இந்த மாநாட்டை உலகத் தமிழர்கள் புறக்கணிக்க வேண்டும் என்று ஒருசிலர் பிரசாரம் செய்து வருகிறார்கள்.

இலங்கை சுதந்திரம் பெற்ற கடந்த 63 ஆண்டு காலத்தில், அனைத்துலக அளவில் தமிழ்ப் படைப்பிலக்கிய மாநாடு ஒன்று இலங்கையில் நடைபெற இருப்பது இதுவே முதல் முறை. தமிழ் நாட்டுக்கு அடுத்ததாக தமிழ் பேசும் மக்கள் அதிகமாக வாழும் நாடும் இலங்கை. அதிகாரத்துவ மொழிகளில் ஒன்றாக தமிழ் அங்கீகாரம் பெற்றிருக்கும் இந்த நாட்டில் முதல் வகுப்பில் இருந்து பல்கலைக்கழகம் வரை தமிழ் மக்கள் தமிழ் மொழியிலேயே படிக்கிறார்கள். பல நூற்றாண்டுகளாகத் தமிழ்ப் பேச்சும் படிப்பும் புழக்கமும் உள்ள இந்த நாட்டில் தமிழ்ப் படைப்பிலக்கியமும் குறிப்பிடத்தக்க அளவில் வளர்ச்சி கண்டுள்ளது. மேம்பட்ட வாழ்க்கைக்காகவும் போர் காரணமாகவும் இலங்கையில் இருந்த புலம் பெயர்ந்து வாழும் இலங்கைத் தமிழ் மக்களும் இந்த இலக்கிய வளர்ச்சியில் பெரும் பங்காற்றியுள்ளனர். தனித்தன்மையான, பரந்துபட்ட, காத்திரமான படைப்பிலக்கியம், இலங்கைத் தமிழ்ப் படைப்பிலக்கியம். கவிதை, சிறுகதைகள், நாவல், நாடகம், விமர்சனம் என பல துறையிலும் இதன் வீச்சு விரிந்துள்ளது. சுதந்திரத்துக்குப் பின்னர் இலங்கையில் தமிழ் மக்கள் பல உச்சங்களை எட்டியிருந்த காலத்திலும், அதற்கு பின்னான போராட்ட காலத்திலும், தனித் தமிழீழ உணர்வு பொங்கிப் பூரித்திருந்த நேரத்திலும் இலங்கையில் படைப்பிலக்கிய ஆக்கம் நடந்துகொண்டே இருந்தது. எனினும் பிறநாட்டுத் தமிழ்க் கலைஞர்களை ஒன்றிணைந்து திரைப்படங்கள் எடுப்பதிலும் கலைநிகழ்ச்சிகள் நடத்துவதிலும் இருந்த ஆர்வம், பிறநாட்டுத் தமிழ்ப் படைப்பாளிகளை ஒன்றிணைப்பதிலோ, இலங்கைப் படைப்பிலக்கியத்துறையை அடுத்த நிலைக்கு எடுத்துச் செல்வதிலோ இருந்ததில்லை.

மிக அவலமான போர்ச் சூழலிலும் இன்றைய அகதி வாழ்வு நிலையிலும் இலங்கையில் இலக்கியம் படைக்கப்பட்டு வருகிறது. ஒரு பேரினத்தின் வரலாற்றைச் சிறு சிறு பகுதிகளாக அவர்கள் ஆக்கிக்கொண்டிருக்கின்றனர். இந்நிலையில் அங்கு ஒன்றுகூடல் மாநாடு நடைபெறுவது, அங்கு வாழும் தமிழ் மக்களுக்கு தன்னம்பிக்கையைத் தரும். படைப்பாளிகளுக்கு ஊக்கத்தை அளிக்கும் உரிமையை நிலைநாட்டுவதில் துப்பாக்கி குண்டுகளைவிடவும் எழுத்துக்கு வலிமை உண்டு என்பதை வரலாறு நிரூபித்துள்ளது. போரின் கோரத்திலும், அவல வாழ்வின் விரக்தியிலும் நொந்து போயிருக்கும் ஈழத்தின் இளம் படைப்பாளிகளின் மனநிலை மாற்றத்துக்கு இந்தச் சந்திப்பு பேருதவியாக அமைவதுடன், பெரும் ஆறுதலையும் தரும். வடக்கிலும் கிழக்கிலும் வாழும் நூற்றுக்கணக்கான தமிழ்ப் படைப்பாளிகள், வெளிநாட்டுப் படைப்பாளிகளுடன் சொந்த நாட்டின் முதுபெரும் கல்வியாளர்களையும் எழுத்தாளர்களையும் சந்திக்க நல்ல சந்தர்ப்பம். மாளாத் துக்கத்துக்குப் பின்னான ஒரு ஒன்றுகூடல், புதுத் தெம்பையும் ஒளியையும் ஊட்டுவதாகக் கூட அமையலாம். எல்லாவற்றையும்விட, இலங்கை மண்ணின் தமிழ் மக்கள் உணர்வை இழக்கவில்லை, உரிமையை விடப் போவதில்லை என்பதை இலங்கை அரசுக்கும், வெளிநாடுகளுக்கும் எடுத்துச் சொல்ல இதுபோன்ற ஆக்ககரமான மாநாடுகள் சாலச் சிறந்தவை. இலங்கைத் தமிழ் எழுத்தாளர்களை அறியவும் அவர்களின் எண்ணங்களைப் பகிரவும் பிற நாட்டு எழுத்தாளர்களுக்கு இது உகந்த ஒன்றுகூடலாக அமையும். பரந்த பார்வையில், வெளியிலிருந்து பார்க்கும் போது இந்த மாநாடு, வரலாற்று முக்கியத்துவம் மிக்கதாகவும் பயன்கள் நிறைந்ததாகவும் தெரிகின்றது. அதேநேரத்தில் மாநாடு எப்படி நடத்தப்படுகிறது, யாரெல்லாம் பங்கேற்கிறார்கள், முன்வைக்கப்பட்ட நோக்கங்கள் நிறைவேற்றப்படுகின்றனவா என்பவையும் முக்கியமானவை.

மாநாட்டின் நோக்கம், திட்டங்கள் குறித்து இலங்கை அனைத்துலகத் தமிழ் எழுத்தாளர் மாநாட்டின் அமைப்பாளர், எழுத்தாளர் முருகபூபதியுடன் 'வல்லினம்' உரையாடியது.

இலங்கையில், நீர்கொழும்பு என்ற சிறுநகரத்தில் 1951ல் பிறந்த லெ.முருகபூபதி 1972ல் 'மல்லிகை' இதழில் வெளியான சிறுகதை மூலமாக இலக்கிய உலகிற்கு அறிமுகமானார். 1977ல் வீரகேசரிப் பத்திரிகையில் பணிபுரியத் தொடங்கிய முருகபூபதி, நீர்கொழும்பு இலக்கிய வட்டத்தின் செயலாளராகவும், இலங்கை முற்போக்கு எழுத்தாளர் சங்கத்தின் தேசியசபை உறுப்பினராகவும், இ.மு.எ.சவின் கொழும்புக் கிளையின் செயலாளராகவும் செயற்பட்டவர். 1975ல் வெளியான 'சுமையின் பங்காளிகள்' என்ற இவரின் முதலாவது சிறுகதைத் தொகுதிக்கு இலங்கை சாகித்திய மண்டல விருது கிடைத்தது. 2003ல் 'பறவைகள்' நாவலுக்காக முருகபூபதிக்கு சாகித்திய விருது கிடைத்தது. 1985ல் சோவியத் யூனியனின் அழைப்பின் பேரில் உலக இளைஞர் - மாணவர் விழாவிலும் பங்கேற்றவர். 1987ல் அவுஸ்திரேலியாவுக்குப் புலம்பெயர்ந்த முருகபூபதி, தொடர்ந்து பல்துறை சார்ந்தும் எழுதிவருபவர். இதுவரை பதினெட்டு நூல்கள் வெளியாகியுள்ளன. ஈழத்தில் யுத்தத்தால் பாதிக்கப்பட்ட மாணவர்களுக்கு உதவும் அமைப்பை கடந்த 20 வருடங்களாக நடத்திவருகிறார். கடந்த பத்து வருடங்களாக அவுஸ்திரேலியாவில் 'தமிழ் எழுத்தாளர் விழா'வையும் முன்னின்று நடத்திவருகிறார்.

வல்லினம்: இந்த மாநாட்டின் நோக்கம்?

அறிந்ததைப் பகிர்தல். அறியாததைப் பகிர்ந்துகொள்ள முயலுதல். தனிப்பட்ட விருப்பு வெறுப்புகளுக்கு அப்பால் ஒன்றுகூடுவதுதான். இலங்கையில் போர் முடிந்த இந்த ஓராண்டு காலத்தில் கிட்டத்தட்ட 160,000 வெளிநாட்டுத் தமிழர்கள் இலங்கைக்குப் போய் வந்திருக்கிறார்கள். இவர்கள் எழுத்தாளர்கள், கலைஞர்கள் என பலரும் அடங்குவர். உதிரிகளாக பல எழுத்தாளர்கள் வந்துபோகும் ஏன் எல்லாரும் ஒன்றாகச் சேர முடியாது.

வல்லினம்: இன்றைய சூழலில் இத்தகைய மாநாடு ஏன் தேவை என நினைக்கிறீர்கள்?

இந்த மாநாடு பல ஆண்டுகளாகத் திட்டமிடப்பட்டது. போர்ச் சூழல் காரணமாக தள்ளிப் போய்க்கொண்டே வந்தது. இப்போது நடத்தாமல், இனி எப்போது நடத்துவது? போரில் அவலத்தில் உழன்ற இலங்கை மக்களின் அன்றாட வாழ்வு தொடராமலா இருக்கிறது? யாழ்ப்பாணத்தில் நல்லூரில் கந்தசுவாமி கோயில் வருடாந்திர உற்சவம் நடக்காமலா இருக்கிறது? கொழும்பில் பிரபலமான ஆடிவேல் விழா நடக்காமல் இருக்கிறதா? இதற்கு தமிழகத்திலிருந்து நாதஸ்வர, தவில் கலைஞர்கள் வருகை தராமலா இருக்கிறார்கள்? கம்பன் கழகத்தின் கம்பன் விழாவும் இசைவேள்வியும் நடக்காமலா இருக்கிறது? மாத்தளை என்ற மலையக ஊரில் பிரசித்திபெற்ற முத்துமாரியம்மன் கோயிலின் வருடாந்திர உற்சவமும் ஐந்துரத பவனியும் பல்லாயிரக் கணக்கான தமிழ் பக்தர்கள் மத்தியில் நடக்காமலா இருக்கிறது.? கொழும்பு புறக்கோட்டையில் தமிழ்ப் பெண்கள் பாற்குடம் சுமந்து திருவிழா நடத்திக்கொண்டிருக்கிறார்கள். வெள்ளவத்தையில் ஆண்கள் வேல்குத்தி பறவைக்காவடி எடுக்கிறார்கள். இலங்கையின் தமிழ்ப் பிரதேசங்களில் கமலஹாசன், ரஜினிகாந்த், விஜய் போன்றோரின் மசாலாப்படங்கள் காண்பிக்கப்படாமலா இருக்கிறது? துக்கம் நடந்த வீட்டில் நல்ல காரியங்களே நடப்பதில்லையா? எழுத்தாளர் விழா எடுப்பதில் மட்டும் என்ன குற்றமுள்ளது?

வல்லினம்: ஏன் மாநாட்டை தமிழ் மக்கள் அதிகம் வாழும் வடக்கிலோ, கிழக்கிலோ நடத்தவில்லை?

யாழ்ப்பாணம், வன்னி, மட்டக்களப்பில் நடத்தத்தான் எங்களுக்கு மிக விருப்பம். இடப்பிரச்சினைதான் மிகப் பெரிய பிரச்சினை. பல நூறு பேர் வந்து தங்க வசதிகள் இல்லை. மேலும் விருந்துபரசனை செய்யும் நிலையிலும் மக்களின் சூழல் இல்லை. அத்துடன் அரசாங்கம் நாளுக்குநாள் சட்டத்தை மாற்றுகிறது. திடீரென கொண்டு வரப்படும் பாதுகாப்பு நடைமுறைகளால் வெளிநாட்டிலிருந்து வருபவர்களுக்கு பாதிப்பு ஏற்பட்டால் என்ன செய்வது? நடைமுறைச் சாத்தியங்கள் இல்லை.

வல்லினம்: ஏன் வேறு நாடுகளில் நடத்தக்கூடாது?

மலேசியா, சிங்கப்பூர், ஆஸ்திரேலியா போன்ற நாடுகளில் நடத்தலாம். ஆனால் இலங்கை எழுத்தாளர்கள் எத்தனை பேர் போக அனுமதி கிடைக்கும்? அப்படிச் செல்பவர்கள் அங்கு கதியாகத் தங்கி விட்டால் ஏற்பாட்டாளர்களுக்குப் பிரச்சினையாகும். இதையெல்லாம் விட எங்களுக்கென்று ஒரு நாடு இருக்கும்போது, ஏன் வேறு நாட்டுக்கு நாங்கள் செல்ல வேண்டும்? எங்கள் நாட்டை நாடி மற்ற நாட்டு எழுத்தாளர்களை வரவழைக்க வேண்டும் என்பதே எங்களது முக்கிய நோக்கம்.

வல்லினம்: தமிழ் நாட்டில் நடத்தலாம் என்று பேராசிரியர் சிவத்தம்பி கருத்துரைத்திருந்தார். அதை வேறு சிலரும் ஆமோதித்திருந்தனர். அது பற்றி உங்கள் கருத்து?

போன 2009 டிசம்பர் மாதம் தமிழ் எழுத்தாளர் விழாவுக்கான ஒன்றுகூடல் கொழும்பில் நடைபெற்ற போது, பேராசிரியர் சிவத்தம்பி உட்பட 100க்கும் மேற்பட்ட படைப்பாளர்கள், கல்வியாளர்கள், பத்திரிகையாளர்கள் பங்கேற்றனர். அனைவரும் மாநாட்டைக் கொழும்பில் நடத்த ஒருமித்த ஆதரவை முன்வைத்தனர். ஏற்பாடுகள் எல்லாம் நடந்த பின்னர், கடைசி நேரத்தில் எழுந்த சர்ச்சைகளுக்காக தமிழ் நாட்டில் நடத்தலாம் என்று பேராசிரியர் கூறுகிறார். எழுத்தாளர் எஸ்.பொ. கீற்று இணையத் தளத்தில் எழுதும் வரை எல்லாருமே இதுகுறித்து ஆக்ககரமான சிந்தனைகளையே வெளியிட்டு வந்தனர். கடைசி நேரத்தில் எல்லாரும் தலைகீழாகப் பேசத் தொடங்கி விட்டனர். ஒரு சிலரின் தனிப்பட்ட பயங்கள், அச்சங்களால் எழுந்த சிறு சர்ச்சை இன்று பெரிதாக வெடித்திருக்கிறது. இதன் பின்னணி விரைவில் வெளிச்சத்துக்கு வரும். எனினும் இந்தச் சர்ச்சை குறித்து இனிநாம் பேச வேண்டாம். தமிழ் நாட்டில் ஆண்டுதோறும் எழுத்தாளர்கள்கூடும் புத்தகச் சந்தை நடைபெறுகிறது. அண்மையில் நடைபெற்ற செம்மொழி மாநாட்டின் லட்சணங்களை அனைவரும் அறிவோம். அனைத்துலகத் தமிழ் மாநாட்டை நாம் அங்கு ஒழுங்கு செய்ய வேண்டியதில்லை. தமிழ் நாடே அதைச் செய்யும்.

வல்லினம்: என்றாலும் நீங்கள் தமிழ் நாட்டு எழுத்தாளர்களைத் தானே இன்னும் சார்ந்திருக்கிறீர்கள், அவர்களை வருந்தி அழைப்பதுடன், அவர்கள் வராதது குறித்த வருத்தமும் உங்களிடம் உள்ளதே?

அப்படியல்லை. அனைவரையும் அரவணைத்துப் போக வேண்டும் என்பதே என் நோக்கம். ஜெயகாந்தன், ஜெயமோகன், எஸ். ராமகிருஷ்ணன் போன்ற உலகளவில் பிரபலமான முக்கியமான எழுத்தாளர்கள் பலர் தமிழ்நாட்டைச் சேர்ந்தவர்கள். இலங்கையிலும் அவர்களை வாசிப்பவர்கள் உள்ளனர். அவர்களது ஆழமான அனுபவமும் மாறுபட்ட பார்வையும் இலங்கையில் வளர்ந்து வரும் எழுத்தாளர்களுக்கு மிகத் தேவை. இத்தகையோரை ஒன்றாகச் சந்திக்கும் வாய்ப்பு இன்றைய சூழலில் இலங்கைப் படைப்பாளிகளுக்குப் பெரும் ஊட்டச் சத்தாக அமையும்.

வல்லினம்: இலங்கைத் தமிழ் இலக்கியமும் இத்தனை வளர்ச்சி பெற்றிருந்தாலும் அதைச் சந்தைப் படுத்துவதற்கு தமிழ் நாட்டு அச்சகங்களையும் பத்திரிகைகளையும்தானே இன்னும் உலகெங்கும் வாழும் இலங்கைத் தமிழர்கள் நம்பியுள்ளனர். பல துறைகளில் வளர்ச்சி பெற்றுள்ள இலங்கைத் தமிழர்களால் பதிப்பகம், அச்சகத் துறைகளில் உலக அளவில் வளர முடியவில்லை. இலங்கையின் பல பத்திரிகைகள் இருந்தும் காலச்சுவடு, தீராநதி, உயிர்மை போன்ற பிரபலமான ஒரு சஞ்சிகையை ஏன் இலங்கைத் தமிழர்களால் கொண்டு வர முடியவில்லை? இந்தப் பத்திரிகைகளில் எழுதுவதே ஜன்மவிமோசனமாக உள்ளது?

உலகத் தமிழ்ச் சமூகத்தின் மையமாக தமிழகம் இருக்கும்பட்சத்தில், தமிழ் நாட்டில் பல தொழில்களைச் செய்யும் இலங்கைத் தமிழர்கள், புலம்பெயர்ந்த ஈழத் தமிழர்களுக்காக ஈழத் தமிழர் ஒருவர் ஏன் தமிழ் நாட்டில் பதிப்பகம் தொடங்கக்கூடாது? அல்லது ஏன் அத்தகைய கட்டமைப்புள்ள ஈழத்தின் பதிப்பகத்தை உருவாக்கி, அதற்கு ஆதரவு தரக்கூடாது? தமிழ் செம்மொழி நிலை பெற்றிருக்கும் நிலையில் வெளிநாட்டு நூல்களை வாங்குமாறு இந்திய நூலகங்களை ஏன் ஈழத் தமிழ் மக்கள் வலியுறுத்தக் கூடாது? இந்திய நூலங்களுக்குச் செல்ல வேண்டும் என்பதற்காகத்தானே பலரும் தமிழ் நாட்டில் நூல்களை அச்சிடுகின்றனர்.

தமிழ்நாட்டைச் சாராமல், இலங்கைத் தமிழ் இலக்கியவாதிகளால் தனித்தியங்க முடியும். செயல்பட முடியும். ஆக்ககரமான ஒரு போட்டிச் சூழலை உருவாக்க முடியும். போருக்கு முந்திய காலத்தில் அதற்கான முயற்சிகள் இருந்தன. பிறகு சரியான நோக்கமும் தனித்துவமும் இல்லாதாதல் அவை வெற்றிபெறவில்லை. எனினும் விரிந்த பார்வையும் நோக்கமும் பரந்த அறிவும் பெற்றுள்ள இன்றைய புலம்பெயர், ஈழத்தமிழ் எழுத்தாளர்களால் நிச்சயம் சார்பற்று தனிச்சக்தியாக உருவாக முடியும். உருவாகுவோம். அதற்கான சில அடித்தளங்களை அமைப்பது இந்த மாநாட்டின் நோக்கங்களில் ஒன்று.

வல்லினம்: இலங்கை எழுத்தாளர்களை எல்லாரையும் ஒன்றுகூட்டுவது உங்களுக்கு நோக்கமாக இருக்கும் பட்சத்தில், நீங்கள் இலங்கையில் மாநாட்டை நடத்துவதால் நாட்டுக்குள் வரமுடியாத சிக்கலுள்ள ஷோபா சக்தி, லஷ்மி, கி.பி.அரவிந்தன் போன்ற பல எழுத்தாளர்களுக்குக் கலந்துகொள்ள முடியாது போகிறதே?

இத்தகைய சில சிக்கல்கள் இருக்கவே செய்கின்றன. காலமும் சூழலும் இப்படியே இருக்கப்போவதில்லை. இது முதல் முயற்சி. அடுத்தடுத்த முயற்சிகளில் நிச்சயம் இவர்களையும் மற்ற எல்லாரையும் இணைப்பதாகவே இந்த மாநாடு அமையும்.

வல்லினம்: மாநாடு எந்தெந்தத் துறைகளை முக்கியமாகக் கொண்டுள்ளது?

உலகம் பூராவும் சிதறுண்டு வாழும் ஈழ எழுத்தாளர்கள் தமது இலக்கிய உறவுகளை மீண்டும் காலம் கடந்துவந்து சந்திப்பதற்கும் குறிப்பிட்ட சந்திப்பானது கூடிக்களைந்து உண்டுகளித்துவிடும் ஒன்றுகூடலாக அமையாமல் பல ஆக்கபூர்வமான கலை, இலக்கியம், மற்றும் கல்வி சார்ந்த பணிகளை முன்னெடுப்பதற்காகவுமே திட்டமிடப்பட்டது.

முதலாவது செவ்விதாக்கம். அதாவது படைப்புகளைச் செம்மைப்படுத்துதல். படைப்பாளிக்கும் பதிப்பகத்துக்கும் இடையில் இருப்பவர்தான் காப்பி எடிட்டர். காப்பி எடிட்டிங் என்பது மிக முக்கியமானது. தமிழ்ப் படைப்பிலயக்தத்துறையில் இது இன்னமும் சரியாக வளரவில்லை.

அடுத்தது மொழிபெயர்ப்பு அரங்கு. இதற்கு எழுத்தாளரும் கல்வியாளருமான பேராசிரியர் நுஃமான் தலைமையேற்கிறார். படைப்புகள் மொழிபெயர்க்கப்படும்போது ஏற்படும் சிக்கல்கள், சங்கடங்கள், எதிர்கொள்ளும் சவால்கள் குறித்த கலந்துரையாடல் நடைபெறும். புலம்பெயர்ந்த நாடுகளில் புதிய தலைமுறை தமிழில் வாசிப்பது இல்லை, அவர்கள் ஆங்கிலத்தில்தான் எழுதுகிறார்கள். ஐரோப்பிய மொழிகளில் எழுதுகிறார்கள். எனவே தமிழில் வந்தவற்றை ஆங்கிலம் மற்றும ஐரோப்பிய மொழிகளின் மொழி பெயர்ப்பது, அந்த மொழிகளில் வெளிவந்தவற்றைத் தமிழுக்குக் கொண்டு வருவது. மேலும் தமிழ் - சிங்கள மொழிகளுக்கிடையிலான மொழி பெயர்ப்புகளை அதிகரித்து மேம்படுத்துவது. இரு இனங்களுக்கிடையிலான புரிந்துணர்ந்துணர்வுக்கு இந்த முயற்சி மிக முக்கியமானது. ஏற்கனவே திருக்குறள், பாரதி கவிதைகள் சிங்களத்தில் மொழிபெயர்க்கப்பட்டுவிட்டன. தமிழக படைப்பாளிகள் புதுமைப்பித்தன், ஜெயகாந்தன், கு.சின்னப்பபாரதி ஆகியோரின் படைப்புகளும் இலங்கையில் டொமினிக்ஜீவா, திக்குவல்லை கமால், மேமன் கவி, செங்கைஆழியான், சாந்தன், மலரன்பன். தி.ஞானசேகரன் உட்பட பல படைப்பாளிகளின் நாவல்கள் சிறுகதைகள் சிங்களத்தில் மொழிபெயர்க்கப்பட்டுவிட்டன. அத்துடன் மார்டின் விக்கிரமசிங்கா, கருணாசேன ஜயலத், குணசேனவிதான, ஜி.பி.சேனநாயக்கா உட்பட பலரது சிங்களப்படைப்புகள் தமிழுக்கு மொழிபெயரக்கப்பட்டுவிட்டன.

சிறுவர் இலக்கிய அரங்கு - இது தமிழ் இலக்கியத்தில் கவனிக்கப்படாமலேயே உள்ளது. மௌனகுருவின் ஒருங்கிணைந்த நாட்டுக்கூத்து அரங்கு, குறும்பட அரங்கு என பல அரங்குகளை அமைக்க முடிவு செய்துள்ளோம்.

வல்லினம்: மாநாட்டின் சுற்றுலாச் செலவை இலங்கை சுற்றுலாத் துறை ஏற்றுக்கொண்டுள்ளதாகக் கூறப்படுவது பற்றி?

சுற்றுலாவே இல்லை. எழுத்தாளர்கள் பேருந்தில் பேராதனை பல்கலைக்கழகத்தில் ஒரு கலந்துரையாடலில் பங்கேற்கிறார்கள். இதைச் சுற்றுலாவாக்கி ஒரு கதை உருவாகியுள்ளது. இலங்கையில் வாழ்க்கைச்செலவு உயர்வினாலும் போருக்குப்பின்னரான பொருளாதார நெருக்கடியினாலும் பெரிதும் கஷ்டமுறும் படைப்பாளிகளிடமிருந்து நிதியுதவி பெறாமல், உலகெங்கும் வாழும் ஈழத்து படைப்பாளிகள் நிதி திரட்டி இந்த மாநாட்டை நடத்துகிறோம். அத்துடன் பாதிப்புற்ற தமிழ்ப்படைப்பாளிகளின் குடும்பங்களுக்கு தொடர்ச்சியாக உதவுவதற்காக ஒரு நம்பிக்கை நிதியத்தை உருவாக்கும் எண்ணத்தையும் வெளியிட்டிருக்கிறோம். நிதி நன்கொடைகளுக்கு பற்றுச்சீட்டுகள் தரப்படுவதுடன் மகாநாடு முடிந்து ஒரு மாத காலத்துள் வரவு-செலவு அறிக்கை அங்கீகரிக்கப்பட்ட கணக்காய்வாளரிடம் (Auditor) காண்பிக்கப்பட்டு உதவியவர்களுக்கும் படைப்பாளிகள் சமூகத்துக்கும் சமர்ப்பிக்கப்படும். மகாநாட்டிற்காக இலங்கையில் பிரத்தியேகமாக ஒரு வங்கிக்கணக்கும் திறக்கப்பட்டு உதவ விரும்பும் படைப்பாளிகள் மற்றும் இலக்கிய ஆர்வலர்களுக்கு தெரிவிக்கப்பட்டுள்ளது. மாநாட்டின் மூன்று நாள் சாப்பாட்டுக்கும், ஒவ்வொரு வேளைக்கும் ஒரு ஆதரவாளர் பொறுப்பேற்றுள்ளார். முதல் நாள் மதிய உணவை என் மனைவியின் குடும்பத்தினர் தங்கள் பெற்றோர் நினைவாக அளிக்கின்றனர். ஆடம்பரமற்ற எளிய விழாவாகத்தான் இந்த விழா நடைபெறுகிறது. மாநாடு முடிந்த பின்னர் யாரிடமிருந்து பணம்பெற்றோம், யார் ஆதரவில் மாநாடு நடந்தது எனக் கூறட்டும்.

வல்லினம்: அரசியல்வாதிகளை அழைத்துள்ளீர்களா?

இலங்கையில் இப்படியொரு சர்வதேச நிகழ்வு நடக்கப்போகும் விடயமே அங்குள்ள எந்தவொரு அரசியல் வாதிகளுக்கும் சொல்லப்படவில்லை. பொன்னாடைகள், பூமாலைகள் கூடாது என நான் கூறியுள்ளேன். இதற்கெல்லாம் இடமளிக்கப் போவதில்லை. காலம் கடந்து குடும்பங்கள் எங்காவது ஓரிடத்தில் ஒன்றுகூடுவதுபோன்று கலை இலக்கிய குடும்பத்தினர் தமது தனிப்பட்ட விருப்பு வெறுப்புகளுக்கு அப்பால் சந்தித்துக்கொள்ள விரும்பியிருக்கிறார்கள்.

வல்லினம்: இலங்கை அரசு மக்களின் வரப்பணத்தில் செயல்படுகிறது. இதில் தமிழ் மக்களுக்கும் உரிமையுள்ளது. இலங்கையில் கல்வி, கலை, இலக்கியம் சார்ந்து தமிழ் மக்களுக்குக் கிடைக்க வேண்டிய உரிமையைப் பெற்றுத் தருவதில் இந்த மாநாடு எந்த வகையில் பங்காற்ற முடியும்?

இலங்கையின் அனைத்துப் பள்ளிகளிலும் நூலகங்களை அமைத்து, தமிழ் நூல்களை இடம்பெறச் செய்வது எங்களது நோக்கங்களில் ஒன்று. இலக்கியம், கலை, கலாசாரம் சார்ந்து அரசின் மானியங்களையும் உதவித் திட்டங்களையும் அங்குவாழும் தமிழ் மக்கள் பெற வேண்டும். இதற்காக கல்வி மற்றும் கலாசார அமைச்சர்களைச் சந்தித்திப் பேசவுள்ளோம். இதற்கும் நிச்சயம் அரசியல் சாயம் பூசுவார்கள்.

வல்லினம்: இப்படி அரசியல் சாயம் பூசுபவர்கள் உங்களுக்கு எந்த வகையில் உதவுவதாகக் கூறுகிறார்கள்? அவர்களது விருப்பப்படி நீங்கள் மாநாட்டை நடத்துவதாக இருந்தால் அவர்கள் உதவுவார்களா?

நிச்சயம் மாட்டார்கள். இதுவரை எவரும், நீ இலங்கையில் நடத்தாதே, சிங்கப்பூரிலோ, மலேசியாவிலோ அல்லது வேறெந்த நாட்டிலோ நடத்த நான் ஏற்பாடு செய்கிறேன் என்று கூறவில்லை. ஒரு வெள்ளிகூட கொடுக்கவும் முன்வரவில்லை. கட்டியவீட்டுக்கு ஆயிரம் குறைகள் மட்டுமே சொல்கிறார்கள்.

வல்லினம்: பிறகு ஏன் நீங்கள் இவர்களுக்கெல்லாம் பக்கம் பக்கமாக பதில் அளித்துக்கொண்டிருக்கிறீர்கள்?

இல்லாவிட்டால் அவர்கள் சொல்வது உண்மையாகிவிடும். இன்றைய உலகம் அப்படித்தான் இருக்கிறது.

வல்லினம்: உங்களது இந்த எல்லாப் பதில்களையும்விட, நீங்கள் நடத்தும் மாநாடுதான் மிகச் சிறந்த பதிலாக அமைய முடியும். நீங்கள் எடுத்திருக்கும் முயற்சியில் இலக்குமாறாமல், கொள்கைகள் மாறாமல் எவ்வளவு தூரம் சிறப்பாக நடத்த முடியும் என்று நினைக்கிறீர்கள்?

நிச்சயம் ஆக்கரமான சில பணிகளைச் செய்ய முடியும் என்றே நினைக்கிறோம். கிட்டத்தட்ட 300 எழுத்தாளர்கள் வரை பங்கேற்பார்கள் எனக் கருதுகிறேன். கடைசி நேரத்தில் யார் வருகிறார்களோ, யார் சந்தர்பவாத பூனையாக மதில் தாவுகிறார்களோ தெரியாது. எனினும் எத்தனை பேர் வந்தாலும் கொழும்புத் தமிழ்ச் சங்கத்தில் மீண்டும் தமிழ் ஓங்கி ஒலிக்கும். வெற்றி கொண்டாடுபவர்கள் கோட்டையில் தமிழ் செழிக்கும். ஈழத் தமிழ் மக்களின் எழுச்சியும் போராட்டமும் புதிய திசையில் தொடங்கி விட்டது என்பதற்கு அச்சாரமாக இந்த மாநாடு அமையும் என்பது உறுதி.

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2010.  |  Designed by CVA | Best View in : Mozilla Firefox |  Best resolution : 1024 X 768