இதழ் 25
ஜனவரி 2011

பிந்தான் தீவிற்கு அருகில் மலேசியாவைச் சேர்ந்த 7 மீனவர்களை எல்லை மீறி நுழைந்ததற்காக இந்தோனேசியா அரசு கைது செய்த பிறகு, அச்சம்பவத்தையொட்டி மலேசிய அரசும் இந்தோனேசியாவின் அத்துமீறலைக் கண்டித்து அவர்கள் நாட்டைச் சேர்ந்த 3 மீன்துறை அதிகாரிகளையும் கைது செய்தது. பிந்தான் தீவின் மீதான சொந்தம் கொண்டாடல் இரு நாட்டிற்கும் மத்தியில் பெரும் அரசியல் சர்ச்சைகளை உருவாக்கிவிட்டன. பிடிப்பட்ட 3 இந்தோனேசிய மீன்துறை அதிகாரிகளை மலேசிய அரசாங்கம் முறைக்கேடாக நடத்தியிருக்கிறது எனக் குற்றம் சாட்டி, ஜகர்த்தாவிலுள்ள மலேசியத் தூதரகத்தின் முன் மலேசியத் தேசியைக் கொடியை எரித்து, மலத்தையும் அள்ளி வீசி ஆர்பட்டம் நடத்தப்பட்டது. இந்தச் சம்பவத்திற்குப் பின்னணியில் பாதிக்கப்படும் / பாதிக்கப்பட்ட மலேசிய மீனவர்களின் இக்கட்டான சூழலைக் கண்டித்து எழுதப்பட்டக் கவிதை.

கடல் காட்டும் எல்லை

எங்கள் கடலுக்கு நியதிகள்
ஏதுமில்லை அர்த்தமுடன் பரந்து விரிந்து
உங்கள் பாதங்களைத் தொடுவதற்கு.
கடலுக்குள் எல்லை வகுத்து
உன் பாதத்தையும் என் பாதத்தையும்
தீண்டத்தகாத பாதையில்
நடக்க வைத்தப் பிறகு
ஏன் எங்களின் மீது மலத்தை
அள்ளி வீசுகிறாய்?

துர்நாற்றம் என்பது
நாம் வகுத்துக்கொண்ட எல்லையில்
திணறிக்கொண்டிருக்க
மீனவர்களின் படகில்
அரசியல் பேசுவதற்கு என்ன இருக்கிறது?
படகில் விழுந்த ஓட்டையும்
படகு கவிழ்ந்த துயரமும்
வெறும் முதல் பக்கச் செய்தியாக
நம்மை உரசிவிட்டுப் போக
மிச்சமாக மிதந்துகொண்டிருக்கின்றன
எல்லை மீறி மீன் பிடித்ததாகச் சொல்லப்பட்ட
மீனவர்களின் கைகளும் வயிறும்.

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2010.  |  Designed by CVA | Best View in : Mozilla Firefox |  Best resolution : 1024 X 768