இதழ் 26
பிப்ரவரி 2011

எலும்புப்பறி

எங்கே உன் எலும்புகள்?
என் எலும்புகள் கடலில் கிடக்கின்றன.

எங்கே உன் எலும்புகள்?
அவை தொலைந்துபோன நிலங்களில்
திருடப்பட்டு, உழப்பட்டு புதைக்கப்பட்டன.

எங்கே உன் எலும்புகள்?
தென்புறத் தீவுகளில்
கண்டுபிடிக்கும் காற்றினால்
அறுத்தெறியப்பட்டன.

எங்கே உன் எலும்புகள்?
மொராக்கி, புராக்கானுய், அராகுரா,
ஒக்காரிட்டோ, முரிஹிக்கு, ராக்கியூரா...
என்று முணுமுணுக்கலாம்.

எங்கே உன் எலும்புகள்?
கனமாக என் இதயத்தில் கிடக்கின்றன.

எங்கே உன் எலும்புகள்?
காலப் பிரக்ஞையற்ற மனத்தில்
ஆடல் பாடல்களாக,
பழஞ்சொற்களாக அரங்கேறுகின்றன.

எங்கே உன் எலும்புகள்?
இதோ இங்கே என் மனவுறுதியில்,
நடக்கும் கால்களில் வலிமையில்,
இறுகும் முஷ்டியில்.
ஆனால்...

எங்கே உன் எலும்புகள்?
ஆ!... என் எலும்புகள்!
ஆளவந்த அந்நியர் உண்ண
ரொட்டிக்கு மாவாக்கப்பட்டன.

கிரைஸ்ட் சேர்ச்சில் பிறந்த கெரி ஹல்ம், மவோரி இலக்கியத்தின் தலையாயப் படைப்பாளிகளில் ஒருவர். சமையற் பெண்ணாக, தொலைக்காட்சி நிலைய இயக்குநராக, சட்டக்கல்வி மாணவியாக, புகையிலை பொறுக்கும் கூலியாக, பஞ்சாலைத் தொழிலாளியாக வாழ்க்கையைத் தொடங்கி, தென் பசிபிக்கின் சிறந்த நாவலாசிரியையாகவும் கவிஞராகவும் அறிமுகமாகியிருக்கிறார்.

இவரது படைப்புகள் தேசிய அளவிலும், உலக அரங்கிலும் கவனத்திற்குரியவையாய் உள்ளன. "எலும்பு மனிதர்கள்" என்ற மவோரி நாவலின் மூலம் ஆங்கில இலக்கிய உலகத்தைக் கலக்கிய இப்பெண்மணி மவோரி - பக்கேஹா (வெள்ளையர்) இனப்பூசல்களையும் பொருளாதாரக் கலாச்சாரச் சுரண்டல்களையும் தத்ரூபமாய் இனங்காட்டத் தவறுவதில்லை.

வவல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2010.  |  Designed by CVA | Best View in : Mozilla Firefox |  Best resolution : 1024 X 768/span>