இதழ் 37
ஜனவரி 2012

செல்ல முயல்குட்டி

ரொம்பவும்
ஆசையாய் வாங்கியது.
எனதல்ல என்றாலும்
பால்நிறம் ஸ்பரிசித்து
வடிவம் சிலாகித்து
ஓடும் அழகை ரசித்த
முதல் நாளிலேயே
ஓர் ஒட்டுதல் உண்டானதெனக்கு.
அன்றாட அவசரங்களால்
மறந்துபோன குற்றவுணர்ச்சியில்
ஒரு ஞாயிறொதுக்கி
கூடிக் குழவியுமாயிற்று.
பெய்பனி இரவில்
குளிருக்கு இதமாய்
காதுகால்வரை மூடியிருக்கும்
இந்தப் போர்வைக்குள்
கிடத்திக் கொஞ்ச
இடமில்லை அதற்கு.
வெளியே
கிடைத்த இடத்தில்
நின்றுகொண்டிருக்கும்
வோல்க்ஸ்வேகனுக்குள்
எனக்கான இடம்
காலியாகவே இருக்கிறது இன்னும் .
செல்ல முயல்குட்டிக்கும்
வாங்கிய காருக்கும்
பெரியதாய்
வித்தியாசங்களேதுமில்லை.
பிஞ்சுக்கால்களுக்கு பதிலாய்
நான்கு சக்கரங்கள்
என்பதைத் தவிர.

நானறியேன் பராபரமே

எவரேனும்
விரட்டியிருக்கலாம்
படியேறி நடக்கையில்
பாய்ந்தோடி வருகிறது
அந்த நாய்.
வெலமீன் வறுவலை
மதியம் உண்டிருந்தாலும்
மனதளவில்
நான் வெஜிடேரியன் என்பதை
நாயின் மோப்ப சக்தி அறியுமா?
நாலுகால் பாய்ச்சலில்
குதிரையொன்று கிளம்ப
சுவரொட்டி நடுங்குகிறதோர் பல்லி.
நெருங்கி வருகையில்
ஒதுங்கிச் சென்று
தெறித்தோடியதைக் கண்டு
சிரிப்பு வந்துவிட்டதெனக்கு.
நாயும் சிரித்திருக்குமா என்பதை
நானறியேன் பராபரமே.

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2012.  |  Designed by CVA | Best View in : Mozilla Firefox |  Best resolution : 1024 X 768