இதழ் 46
அக்டோபர் 2012

கடந்த 29 மற்றும் 30 செப்டம்பர் 2012-ல் நடைபெற்ற
வல்லினம் வகுப்புகள் 2 - அமைப்பியலும் பின் அமைப்பியலும்
நிகழ்வின் போது எடுக்கப்பட்ட புகைப்படங்கள்
http://photobucket.com/vallinamclasses2

Vallinam Classes 2 Photo Slide Show - Install Flash Player To View

29 & 30 அக்டோபர் 2012-ல் வல்லினம் மற்றும் செம்பருத்தி இணைந்து அமைப்பியல் மற்றும் பின் அமைப்பியல் தொடர்பான வகுப்பை கோலாலம்பூர் கிராண்ட் பசிப்பிக் தங்கும் விடுதியில் நடத்தியது.

இவ்வகுப்பை தமிழகத்திலிருந்து வந்திருந்த எழுத்தாளர் தமிழவன் அவர்கள் வழி நடத்தினார். தமிழவன் தமிழ் ஆய்வாளர்களில் முக்கியமானவர். இலக்கியவாதி, படைப்பாளி, விமர்சகர் மற்றும் திறனாய்வாளர். சிறுகதைகள் மற்றும் புதினங்களையும் எழுதியுள்ளார்.

சிவா பெரியண்ணன் நிகழ்வு நடைபெறும் நோக்கத்தை விளக்கினார். இலக்கியவாதிக்கு எவ்வாறான நுட்பமான பார்வை இருக்க வேண்டும் எனக்கூறி இந்நாட்டில் இளம் தலைமுறையினரை இலக்கியத்தோடு இணைக்கும் முயற்சி குறித்து கூறினார். தொடர்ந்து நிகழ்ச்சி அறிவிப்பாளராகப் பணியாற்றிய தயாஜி தமிழவனின் ஆளுமை குறித்து விளக்கினார். அடிப்படையான பகிர்வுகள் முடிந்தபின் தமிழவனின் வகுப்புகள் நடைபெற்றன.

அமைப்பியல் தமிழில் வந்த சூழல், அமைப்பியலின் அடிப்படைகள், அமைப்பியலும் இலக்கியமும், பின் அமைப்பியல், தமிழ் இலக்கியங்கள் என அவரது ஐந்து அமர்வுகளும் ஒவ்வொரு தலைப்பினை அடிப்படையாகக் கொண்டிருந்தன.

அமைப்பியல் என்பது மொழியை அடிப்படைச் சிந்தனை முறையாகக் கொண்டது. சசூர் மொழி என்பது சப்த குறிகளின் இணைப்பாலான அமைப்பு என்கிறார். மொழி என்பது இடுகுறி அர்த்தம் கொண்ட குறிகளாலான தொகுப்பு.

தமிழவன் முதலில் 'குறியீடு' குறித்து விளக்கினார். மொழி சப்தங்களால் ஆனதை தெளிவுபடுத்தினார். அவர் பேச்சு 'ஆசிரியனின் மரணம்' எனும் பகுதிக்கு வந்ததும் சுவாரசியம் கூடியது. மிஷேல் ஃப்யூக்கோ தனது ’ஆசிரியன் என்பது எது?’ என்ற கட்டுரையிலும் ரோலாண் பார்த் தனது கட்டுரை ஒன்றிலும் இக்கருத்தைக் கூறுவதைச் சுட்டிக்காட்டினார்.

இவர்கள் இருவரும், இலக்கியத்தின் பேச்சை நிகழ்த்த ஒரு தனி நபர் இணைப்புச் சங்கிலியாய் வேண்டும் என்பதை மறுக்காவிடினும் ஆசிரியன் மூலமே எழுத்து இயங்குகிறது என்ற சிந்தனையை மறுத்ததோடு, எழுத்தாளன் தெய்வம் என்பது போன்ற மாயையை விளக்கி படைப்பே முக்கியம் என்ற கருத்து வலிமையுறுகிறது என்றார் தமிழவன். அதே போல இன்று இலக்கிய உலகில் பிரபலமாகப் பயன்படுத்தப் படும் 'பிரதி' என்ற சொல்லையும் விளக்க முற்பட்டார்.

பின் அமைப்பியல் ஆசிரியனை ஒதுக்கிய பின்பு, வாசகனுக்கும் வியாக்கியானக்காரனுக்கும் மகுடம் சூட்டியது. வாசிப்பே சர்வ வல்லமையானது. நபர் மறைய வாசிப்பு என்னும் செயலில் பிரதி புது விளக்கம் பெறுகிறது. பிரதி எழுத்து வடிவத்திலோ, ஓவிய, சமிக்ஞை வடிவங்களிலோ வெளிப்படும். குறிப்பான்களின் மூலம் ஒன்றை வாசிக்கும் செயலின் போது அங்கு இருப்பதாக நினைக்கப் படுவதே பிரதி என பங்கேற்பாளர்களுக்குத் தெளிவு படுத்தினார்.

தமிழவனின் விளக்கங்கள் பல பங்கேற்பாளர்களுக்குக் குழப்பங்களை உண்டு பண்ணியதால் கேள்வி - பதில் அங்கங்கள் மூலமாக அவற்றை தெளிவுபடுத்திக்கொண்டனர். இரவு அமர்வில் தமிழவன் கட்டவிழ்ப்பு குறித்து பேசினார். கட்டவிழ்ப்புத் திறனாய்வு, இலக்கியம் உருவாகியுள்ள மொழியைத் தகர்க்கிறது. மொழியின் ஒருமையைக் கேள்விக்குள்ளாக்குகிறது. கட்டவிழ்ப்புத் திறனாய்வு, மொழிக்குள் இயல்பாக உள்ள முரண்பாட்டை வெளிப்படுத்துவதன் மூலம் மொழியின் நிலைத்த தன்மையை அழிக்கிறது. அதன் பின்பு மொழி, பல்வேறு சாத்தியப்பாடுகளின் தளமாய் தொடர்ந்து பார்க்கப்படத்தக்க ஒன்றாகிறது என விளக்கினார்.

அதேபோல கட்டவிழ்ப்புச் சிந்தனை அமெரிக்காவில் பரவிய போது அங்கு ஏற்கனவே பரவியிருந்த புது விமரிசனம் என்ற சிந்தனையால் தாக்கமுற்றது. பால் டெ மான் (Paul de Man) போன்ற ஆங்கிலக் கல்வித் துறை சார்ந்த விமரிசகர்கள் அமெரிக்க சூழலுக்கு ஏற்ற விதமாய் கட்டவிழ்ப்பு இலக்கியத் திறனாய்வு ஒன்றை உருவாக்கினர். கட்டவிழ்ப்புச் சிந்தனை 'இருமை எதிர்வு’களைப் பிரதியில் கண்டு அவற்றுக்கு நடுவில் உள்ள ஏற்றத்தாழ்வு மதிப்புகளை அழித்தது என்றார்.

இதுபோன்ற விளக்கங்களுக்குப் பின்பே அன்றையப் பிரதான தலைப்பான அமைப்பியலுக்குள் வர முடிந்தது.

நவீன மொழியியல் கோட்பாடுகளின் மாதிரியில் இலக்கிய விமரிசனம் செய்வதை அமைப்பியல் விமரிசனம் என்றார் தமிழவன். பாரிஸில் இருந்த பல இலக்கிய ஆய்வாளர்கள் மொழியியல்வாதி ஃபெர்தினெந்த் தெ சசூரின் சிந்தனைகளை மாதிரியாக வைத்து இலக்கியத்தை அணுகும் முறையை உருவாக்கினர். அது அமைப்பியல் இலக்கிய விமரிசனம் எனப் பெயர்பெற்றது என்றார். எல்லாம் சில குறிகளைப் பல்வேறு இணைவு விகிதத்தில் கொண்டிருக்கும் அர்த்த உற்பத்திக்கான ஊடகங்களாய் பார்க்கப்பட்டன. மனித உணர்வுகள், தனிப்பட்ட ரசனை போன்றன இலக்கியத்திலிருந்து அப்புறப்படுத்தப்பட்டன. இலக்கியம், முதல் வகை மொழி ஒழுங்கின் மீது அமைந்திருக்கும் இரண்டாம் வகை மொழி ஒழுங்கு என விளக்கப்பட்டதைக் கூறியவர் பின் அமைப்பியலையும் விளக்கினார்.

"1970 வாக்கில் பிரான்சில் அமைப்பியல் கொடி கட்டிப் பறந்த போது அதனை மதிப்பிழக்க வைத்தது பின்-அமைப்பியல் எனப் புரிந்தது. 1966-இல் அமெரிக்காவில் உள்ள ஜான் ஹாப்கின்ஸ் பல்கலைக் கழகத்தில் ழாக் டெரிதா அவர்கள் லெவி ஸ்ட்ராஸின் அமைப்பியலை விமர்சித்து மதிப்பிழக்க வைத்துள்ளார். அமைப்பியலின் மையத்தைச் சுட்டி அது விஞ்ஞானத்துக்கு எதிரான கருத்து என விவாதித்தார். கட்டுப்படா வித்தியாசங்களின் முடிவுறா விளையாட்டை மொழியியல் ஏற்பதில்லை என்றார் டெரிதா. மையத்தைக் கட்டவிழ்க்க வேண்டும் என்றார். இங்குப் பின்-அமைப்பியல் தோன்றுகிறது" என விளக்கினார் தமிழவன்.

அப்போதுதான் ஆசிரியன் இறந்து போனான்; பிரதி தான் இலக்கியத்தைப் பதிலி செய்துள்ளது என்றெல்லாம் புதுக் கருத்துக்கள் தோன்றியுள்ளன. பிரதி என்பது குறிப்பான்களால் (signifiers) கட்டமைக்கப் பட்ட வாசிப்பு முறையேயன்றி வேறல்ல. எழுத்து ஏற்கனவே இருப்பதல்ல; அது வாசகனால் மொழியால் கட்டுப் படுவது. பிரதிக்குத் தனி மனிதக் குணம் இருப்பதில்லை போன்ற கருத்துகளும் அப்போது உருவானதைச் சுட்டிக்காட்டினார் தமிழவன்.

இவ்வாறான அறிமுகங்களுக்குப் பின்னர் புதுமைப் பித்தனின் 'பொன்னகரம்' சிறுகதையும் சிவா பெரியண்ணனின் 'என்னை நாயென்று கூப்பிடுங்கள்' கவிதையும் அமைப்பியல் ரீதியில் குழு முறையில் ஆராயப்பட்டன. தமிழவன் சிவாவின் கவிதையை வெகுவாகப் பாராட்டினார்.

மறுநாள் பட்டறை சுஹாகாம் தலைவர் கா.ஆறுமுகத்தில் உரையோடு நிறைவு பெற்றது. மதியம் 2 மணிக்குப் பொது நிகழ்ச்சி ஆரம்பமானது. இந்நிகழ்வுக்கு 'பிரிமாஸ்' கல்லூரி மாணவர் ஒருவர் சிறப்பு விருந்தினராகக் கலந்துகொண்டு ஆசிரியர்கள் எவ்வாறு தன் பின்னடைவுக்குக் காரணமாக இருந்தனர் என உருக்கமாகக் கூறினார். அதன் பின்னர் தமிழவனின் உரை தொடங்கியது.

சிற்றேடு வரலாற்றையும் தமிழில் அதில் பங்களித்த முக்கியப் படைப்பாளிகள் குறித்தும் விளக்கினார். குறிப்பாக, மஹாத்மனின் சிறுகதைகளை அவர் சிலாகித்துப் பேசினார். அவரின் சிறுகதைகள் மலேசிய தன்மையுடன் இருப்பதையும் உலகத்தமிழ் சிறுகதை உலகில் மிக முக்கியமான பதிவு எனவும் பாராட்டினார். மஹாத்மனின் கதைகள் உலகத் தரமானவை என அவர் கூறியதும் அரங்கம் கைத்தட்டியது.

மாலை நான்கு மணியளவில் நிகழ்வு முடிவுற்றது.

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2012.  |  Designed by CVA | Best View in : Mozilla Firefox |  Best resolution : 1024 X 768