வல்லினத்தில் தேடுதல்

எழுத்துரு உதவி / Tamil Font Help 

கட்டுரை

சே குவேரா: சில நினைவுகள்

சி. மணிஜெகதீசன்

காலம் எல்லாவற்றையும் ஜீரணித்தவாறு முன்னகர்கிறது. அதன் முரண்யியக்கத்தில் தடம்பதித்து சரித்திரத்தில் நிலைபெற்றுவிடுகிற ஆளுமைகளில் 'சே' என்று பெரிதும் அறியப்படுகிற எர்னெஸ்தோ 'சே' குவேரோ லின்ச் டி லா செர்னா மிக முக்கியமானவர்.

'சே' என்னும் பன்முக ஆளுமையை எப்படி எதிர்கொள்வது என்ற பிரமிப்பிலும், எண்ணற்ற பதிவுகளில் அவரின் வாழ்வு அலசப்படுவதையும் கண்டுமே பல நாட்களைக் கடத்திவிட்டு, என் புரிதலை மட்டுமே இங்கு பகிர்ந்து கொள்ள விழைகிறேன். இலட்சக்கணக்கான இணையப் பதிவுகள், வலைப்பூக்கள், கட்டுரைகள், பத்திகள் 'சே'வைப் பற்றி எழுதிக் கொண்டே இருக்கின்றன. எந்தக் காலத்திலும் ஒரே கோட்டில் பயணிக்க இயலாத, ஆனால் அப்படி ஒன்று இருப்பதாய் கூறிக்கொள்ளும் ஏகாதிபத்திய பாசிஸ்டுகளின் பிரமிப்பூட்டும் புனைவுகளும், இழப்பதற்கு ஒன்றுமில்லை, கைவிலங்குகளைத் தவிர என குரலெழுப்பில் போராடும் பாட்டாளி வர்கப் போராளிகளின் தீவிர அவதானிப்பிலும் 'சே'யின் வாழ்வும் அவரின் கனவுகளும் தொடர்ந்து மொழிபெயர்க்கப்பட்டு காலத்தினூடே பயணம் செய்கின்றன.

என் பல்கலைக்கழக காலங்களில் பொதுவுடமை மற்றும் வர்க்கப் போராட்டம் பற்றிய விரிவுரைகளில் 'சே'வைப் பற்றிய எந்தக் குறிப்பும் வழங்கப்படாதது பெரிதும் வியப்பூட்டிய ஒரு விஷயமாகும். மூன்று ஆண்டுகால சமூகவியல் பாடத்திட்டத்தில் 'சே' இடம்பெறாதது, அவரின் ஆளுமைப் பற்றி விரைவில் அறிவதில் இருந்து என்னைத் தடுத்து விட்டது. பொதுவுடைமைப் பற்றிய தெளிவும் நுனிப்புல் மேய்ச்சல்தான். 'கார்ல் மார்க்ஸ்' பற்றியும், 'பிராய்ட்' பற்றியும் பேசியே நிறையை பேரை மிரட்டிவிட முடியும் என்பது அனுபவித்து அறிந்த உண்மை! 'சே'வின் மிடுக்கான தோற்றம் (ஆஸ்துமாவால் அவரின் சீர்குலைக்கப்பட்ட உடல் தெரிவதே இல்லை). நட்சத்திரம் பதித்த தொப்பியுடன் கூடிய உலகப் புகழ்பெற்ற நிழல்படம், மனதைப் பிளந்து உள் செல்லும் கூர்மையானப் பார்வை, சுருண்டு நீண்ட அழகிய கேசம் எல்லாம் ஒன்றிணைந்து அவருக்கு ஒரு ரோமாண்டிக் சரித்திர நாயகனின் பிம்பத்தை கொடுத்தன. 'சே'வைப் பற்றி இளையோரின் பொதுப்புத்தியில் பதிந்துவிட்ட இப்படியான தாக்கம்தான் எனக்கும் ஏற்பட்டது. ஆயினும் அந்த ஈர்ப்பின் நீட்சியில் எனக்குக் கிட்டிய மாற்று சிந்தனைகளும், பார்வையும்தான் இந்தக் கட்டுரையின் பின்புலமாகும்.

கல்வியில் தேர்ந்த ஒரு டாக்டர் (அவர் முழு தகுதி பெற்ற மருத்துவரல்ல என்ற கருத்தும் உண்டு), மோட்டார் வண்டியில் நீண்ட பயணம் மேற்கொண்ட ஒரு ஸ்டைலா இளைஞர், ஏழைகளையும், ரோகிகளையும் நெருங்கிக் கண்டு அரவணைத்த, சிகிச்சையளித்த கருணை கூர்ந்த சமூகவாதி ஆகிய பிம்பங்கள் அவரைக் கொண்டாடப் போதுமானவையாக உள்ளன. போராளி, புரட்சிக்காரன், வஞ்சிக்கப்பட்ட மூன்றாம் உலக நாடுகளின் Messiah எனும் பட்டயங்கள் 'சே' யின் பிம்பம் ஒரு படிமமாகவே இளையோர் மனதில் நிலை கொண்டுவிட காரணமாகிவிட்டது. அவரின் கோட்பாடு சார்ந்த வாழ்வியலோ, நலிந்தவர்களின் நலன் வேண்டிய போராட்டத்தை முன்னெடுக்க அவர் செய்த தியாகங்களையோ தெரிந்து கொள்வதில் யாருக்கும் பெரிய அக்கறை ஒன்றும் இல்லை. 'சே' என்னும் 'மானுடத் தேடலின் உச்ச உருவகம்' (லீன் பாஃ சார்த்தரின் வார்த்தைகள்) வாழ்வாதாரத் தேடலின்போது கடந்து செல்ல வேண்டியிருந்த சிதைவுகள் பற்றி பெரிதும் பொருட்படுத்தப்படுவதில்லை.

'சே'யின் புகழ் உலகெங்கும் பரவ என்ன காரணம் இருக்க முடியும்? அவர் புரட்சிக்காரர்களின் மிகப் பிரசித்திப் பெற்ற குறியீடாக இருக்கிறார். உலகின் எந்த மூலையிலும் ஆதிக்கச் சக்திக்கு எதிராக எழும் குரல்களுக்கு முகம் கொடுப்பது 'சே'யின் வெட்டுருக்கள்தான். இளைஞர்கள் 'சே'வை தங்களின் மிக நெருக்கமான சகாவாகக் கண்டனர். சேயின் 'மோட்டார் சைக்கிள் டைரி'யைப் படிக்கக் கிடைக்கும் ஒருவருக்கு, வாழ்க்கையின் சகல இன்பங்களையும் சொட்டு சொட்டாய் அனுபவித்து உள்வாங்கிய கவர்ச்சி மிக்க இளைஞன் கானாக் கிடைக்கிறான். 'சே' ஒரு நாடோடி. இத்தகைய வாழ்க்கையை மேற்கொண்ட ஓர் இளைஞனை, மனதுக்கும் சிந்தனைக்கும் மிக நெருக்கமாய் இளைஞர்கள் வரித்துக் கொண்டதில் ஆச்சரியமில்லை. சே குவேரா இளைஞர்களின் குதூகலக் கனவு. கொஞ்ச கால உணர்ச்சி வெறிப்பாட்டிற்கான 'குறியீடு'. பிறகு, சாவகாசமாய் அவரை புறந்தள்ளிவிட்டு அடுத்த கட்ட லோகாயதத் தேடலுக்குள் தொலைந்து போய்விடுகின்றனர். 'சே' வெறும் காலக்குறியீடாக மட்டுமே எஞ்சி நிற்கிறார்.

எல்லாப் புரட்சிக்காரர்களுக்கம் எக்காலமும் நடக்கும் சிதைவுதான். ஆனால் 'சே' இச்சிதைவில் இருந்து ஆக்கம் பெற்றது எப்படி? 100 உலக 'ஐகோன்' (icon)களில் ஒருவராக 'டைம்ஸ்' சஞ்சிகை 'சே'வை அடையாளப் படுத்த காரணம் என்னச ஒரு சாரரால் மதித்துப் போற்றப்படும் 'சே', அதே அளவு மிகக் கடுமையாக விமர்சிக்கப்படுவதற்கு காரணம் என்ன சோசலிசப் 'புனிதராகவும்', ஈவிரக்கமற்ற, வெறுப்பையோ ஆயுதமாக மாற்றிக்கொண்ட, வஞ்சம் நிறைந்த கொலைக்காரனாகவும் ஒரே நேரத்தில் அடையாளங்காணப்படுவது அவரைச் சுற்றி மென்மேலும் மாயச்சூழல் ஒன்றை கட்டவிழ்த்து விடுகிறது. இம்மாயச் சூழல் எல்லோருக்கும் இணக்கமான ஒன்றாக இருப்பது அவரைப் பற்றிய நடுநிலையான புரிதலை மறுதலிக்கிறது. 'சே'யின் உண்மை முகத்தை, வாழ்நாள் முழுவதும் தொடர்ந்து மேற்கொண்ட புரட்சி நடவடிக்கையின் உந்து சக்தியை, கிரியா ஊக்கியைப் பற்றி தெளிவுர புரிந்து கொள்வது இலகுனானா காரியமன்று.

அர்ஜென்டினா வழியான நீண்ட பயண, அப்பயணத்தின் போது அவர் கார்டோபாவில் கண்ட குஷ்டரோகிகளின் துயரம் மிக்க வாழ்வு, சிலி, பெரு, கொலம்பியா, வெனிசுவேலா போன்ற நாடுகளுக்கு தன் நண்பருடன் மேற்கொண்ட பயணம் அவருக்கு மனதில் அறைந்து காட்டிய ஏழைகளின் நலிந்த வாழ்க்கை அனைத்துமாக அவர் வாழ்க்கையைப் புடம் போட்டன. இவற்றின் ஒரே தீர்வாக அவர் கண்டுகொண்டது சோசலிஸத்தைத்தான். சோசலிஸம் வடிவமைத்த சமூக நீதியே மானுட அவலங்களை முற்றும் கலையைக் கூடிய ஊடகமாக 'சே' தேர்வு செய்தார். அந்தக் கோட்பாட்டின் அடிப்படையிலேயே உலக மாற்றங்களை புரிந்து கொண்டு ஏழைகளின் பொருள்முதல்வாதிகளின் பிடியில் சிக்குண்டு வாழ்க்கையைத் தொலைத்து நின்ற லத்தின் அமெரிக்க பாட்டாளிகளை, மீட்டெடுக்கத் தேவையான ஆன்மீக உந்துதலைப் பெற்றார்.

சே குவேரா தன் வாழ்நாளின் இறுதிவரை ஒரு புரட்சியாளராகவே இருந்து வந்தார். சுதந்திர கியூபாவில் தனக்கு வழங்கப்பட்ட பதவிகளில் அவரால் நிலைத்து செயல்படமுடியாமைக்கு அவரது 'நாடோடி'க் குணமும், நாட்டின் எல்லைக் கோடுகளைத் தாண்டிய மனிதநேயமும் முக்கிய காரணங்களாக விளங்குகின்றன. "மனித குலத்தை மீட்கும் புனிதச் செயல்தான் நம் ஒருங்கிணைந்த போராட்டத்தின் லட்சியமாக இருக்கும்," என்று மூன்று கண்டங்களின் மாநாட்டில் சே தனது செய்தியாகக் கூறியதை இந்த அடிப்படையிலேயே நாம் புரிந்துக் கொள்ள இயலும். புரட்சியாளனாகவே மடிவதுதான் 'சே' தெரிவுசெய்துகொண்ட வாழ்க்கைக்கு உன்னதமான முடிவாக இருக்கும். 39வது வயதில் அவ்விதமாக பொலிவியாவில் அவர் வாழ்க்கை துப்பாக்கித் தோட்டாக்களின் வழி முடிவுக்கு வந்தது. தன்னைச் சுட்டுக் காயப்படுத்திச் சிறைப் பிடித்தவர்களிடம் சே சொன்னார். "நான் சே குவேரா, என்னை கொல்வதைவிட உயிருடன் வைத்திருப்பதே உங்களுக்கு அதிகப் பயன் அளிப்பதாக இருக்கும்". ஆனால், அவரைக் கொன்று 'சே'யின் நிலைப்பை உறுதி செய்துவிட்டனர். "கோழைகளே சுடுங்கள், நீங்கள் கொல்லப்போவது ஒரு மனிதனை மட்டுமே" என்று மனத்தின்மையுடன், தீர்க்கதரசனத்துடன் கூறினார் சே. சே என்ற மனிதன் இல்லை; அவரின் ஆளுமையின் உக்கிரம் உணரப்பட்டுக் கொண்டே இருக்கிறது. ஃபிடல் காஸ்ட்ரோ கூறுவது போல், எங்கெல்லாம் நியாயத்தை நிலை நிறுத்த போராட்டம் நடைபெறுகிறதோ, அங்கெல்லாம் சே இருக்கிறார்.

நவீன மனிதன் (new man) உருவாக வேண்டும் என்ற சே-யின் கனவு அதீதமான ஒன்றாக புறக்கணிக்கப்படுகிறது. ஆனால் நியாயமான, சமவுரிமை பெற்ற ஒரு சமுதாயம் உருவாவதைக் காண சே மேற்கொண்ட முழுமையான முயற்சிகளை சுலபமாக ஒதுக்கித் தள்ளிவிட இயலாது. உலக நாடுகளின் மேய்ப்பனாக தன்னை சுயமாக நியமித்துக் கொண்ட வல்லரசுகளை மிகக் கடுமையாக அவர் எதிர்த்தார். அமெரிக்க ஏகாதிபத்தியத்தை தனது இறுதி மூச்சுவரை வன்மையாக எதிர்த்தார். பொதுச் சந்தை வர்த்தக நடப்பில் மனித விடுதலை, மீட்சி போன்ற கோட்பாடுகளின் உள்ளீடு என்ன? சந்தையின் தேவைக்கு நம்மை விட்டுக் கொடுப்பது, விலைக்கு விற்பது, சுயத்தை இழப்பதுதான் என்பது சே-யின் ஆணித்தரமான கருத்தாகும். அழகிய, ஒப்பனை செய்யப்பட்ட சமூகவியல் கோட்பாடுகளை உருவாக்கி உலவவிடுவதால் சீர்கேடுகளும், துயரமும், ஏழ்மையும் தீர்ந்துவிடாது. எல்லா விஷயங்களையும் கட்டுடைத்துக் கொண்டே போய், தீர்வுகளற்ற, தீர்வை நம்பாத ஒரு பொதுப்புத்தியை வஞ்சகமாக கட்டமைப்பதுதான் இன்றை சந்தை நடைமுறையில் ஆட்சி புரிகிறவர்களின் நிலைப்பாடாகிவிட்டது. மற்றவர்களுக்காக உழைப்பதற்காகத்தான் நாம் பிறந்தோம் என நம்பவைக்கப்பட்ட சரித்திரம் நம்முடையது. இப்படியான பசி, பிணி, எனும் அழுக்கும், கோரமும் நிரம்பிய வாழ்க்கையை, கல்வியின்மையை, விபச்சாரத்தை நூற்றாண்டு காலமாய் விதியென தலைமீது சுமத்தி அடிமைப்படுத்தப்பட்ட மக்களின் மீட்சிக்காக உழைத்தவர் சே. உலகை அழகு படுத்த தம்மை அர்ப்பணித்துக் கொண்ட ஆன்மா. அந்த முயற்சியில் அவர்மீது வந்து ஒட்டிக் கொண்டு விட்ட அவதூறுகள், கீழறுப்புகள், ஏளனங்கள் மிக அதிகம். தம்மை தொடர்ந்து கடுமையாக தாக்கி சுயம் இழக்கச் செய்த ஆதிக்கச் சக்திகளை வென்றெடுக்க தேவையானது வெடித்துக் கிளம்பி துவம்சம் செய்யும் ஆயுதப் புரட்சிதான் என்பது சே-யின் அறுதியான முடிவாகும். வேறு வழியில்லை. 'கெரில்லா குடும்பம்' எனும் தமது நாவலில் பிரமோட்யா அனந்ததோர் (இந்தோனேசியா) சொல்வதுபோல், 'மனிதத் தன்மையை தியாகம் செய்தேன், என்ற கருத்தாக்கம் சே தனது செயல்பாடுகளுக்கு எதிராக செயல்பட்ட புரட்சியை முடக்கிப் போட நினைத்தவர்களை கொன்று ஒழித்ததை சற்றேனும் புரிந்து கொள்ள உதவும். எண்ணிக்கையிலும், வலுவிலும் மிகப் பெரிய அளவில் உள்ள முதலாளி வர்கத்தை எதிர்கொள்ள அதிகபட்ச முன்னெச்சரிக்கையும், கொஞ்சம் கூட சமரசம் செய்து கொள்ளாத, கறாரான அணுகுமுறையும் அவசியம். இதில் சற்றேனும் கவனக்குறைவு ஏற்படும்போது புரட்சியின் வேர்கள் வெட்டப்பட்டுவிடும். 'சே' போன்ற தேர்ந்த புரட்சியாளர்கள் இந்நிலை ஏற்பட அனுமதிப்பதில்லை. அதிகா வர்கத்தினர், தமது திறமையான கேந்திர, நிபுணத்துவ வாய்ப்புகளைப் பயன்படுத்தி மேற்கொள்ளும் 'கருத்துக் குளோனிங்' பல புரட்சி இயக்கங்களை வேரோடு சாய்த்துவிட்டிருக்கிறது. இந்நிலையைத் தவிர்ப்பதற்கு தாட்சண்யமற்ற நடவடிக்கைகளை சே மேற்கொண்டார்.

சே-யின் ஆளுமை பன்முகத்தன்மை கொண்டது. வாசிப்பது ஒவ்வொரு மனிதனுக்கும் மிகவும் அவசியமானது என்பதை அவர் வாழ்நாள் முழுவதும் வலியுறுத்தி வந்திருக்கிறார். (பொலிவிய நாட்குறிப்பு). வாசிப்பு மனிதனுக்கு அடிப்படை கலாச்சாரத்தைக் கொடுக்கிறது. மற்ற நாடுகளையும் அவற்றின் மக்களையும் புரிந்து கொள்ள உதவுகிறது என்கிறார். தனது முதுகுப் பையில் எப்போது புத்தகங்களுடனேயே இருந்தவர் சே. கடுமையான ஆஸ்துமாவினால் அவதியுற்ற காலங்களிலும் கையில் தடிமனான புத்தகத்தை வாசித்தபடிதான் இருந்திருக்கிறார். சே வரலாற்றை மிக விருப்பிக் கற்றார். அவர் சோர்வற்ற ஓர் ஆசிரியர்; சற்றும் சளைக்காத ஒரு மாணவன். தனது புகழ் பெற்ற வார்த்தைகளில் சே கல்வியின் அவசியத்தைப் பற்றி குறிப்பிடுகிறார், "மனிதன் முழுமையற்ற ஒரு படைப்பு. தொடர் முயற்சிகளால் மட்டுமே அவனது களையப்பட்டு அவனை முழுமைப்படுத்த இயலும். அதற்கு இருவழி போதனை அவசியம். முதலானதாக, சமுதாயம் வழங்கும் நேரடியான அல்லது மறைமுகமான பட்டறிவு. அடுத்ததாக, ஒரு தனிமனிதன் தொடர்ந்து மேற்கொள்ளும் சுய அறிவுத் தேடல். "இந்த அடிப்படையில்தான் 'சே' தன் "நவீன மனிதன்" என்ற கருத்தாக்கத்தை கட்டமைத்தார்.

எர்னெஸ்டோ சே குவேராவின் ஆளுமை இன்னும் ஒரு வலுமிக்க சக்தியே. 'நாங்கள் அவரை மறக்கடிக்கச் செய்யமாட்டோம்' என்கிற லத்தின் அமெரிக்கர்களின் சபதமும், 'நாங்கள் சே'வைப் போல் ஆவோம்' என்று அனுதினமும் கூறும் கியூபப் பள்ளிச் சிறார்களும் அவர் இருப்பை நிலைக்கச் செய்து கொண்டிருக்கின்றனர். ஆயினும், ஒரு சமுத்துவம் நிறைந்த உலக சமுதாயத்தை உருவாக்க எண்ணிய 'சே'யின் கனவு முழுமையாக நிறைவேறவில்லை. 'சே'என்ற ஆளுமையின் பிம்பம் அவரது போராட்ட உள்ளீடுகளை சே பெரிதும் எதிர்த்த சோசலிச வாழ்வியல் கூறுகளை பின்தள்ளிவிட்டது.

முதலாளி வர்கத்தினரின் நுகர் பொருள் கலாச்சாரமே 'சே'யின் பிம்பத்தை லாவகமாக உள்வாங்கிப் பயன் அடைந்தது. 'சே' சந்தைப் பொருளாகிவிட்டார். அவரின் கனவுகள் வியாபாரமயமாக்கப்பட்டுவிட்டன. சாம்பல் தட்டும் கிண்ணங்களிலும், ஜீன்ஸின் பின்புறத்திலும் கழுத்தில் தொங்கும் பெரிய சங்கிலி டாலரிலும் அவரை கூவிக் கூவ விற்கின்றனர். அவரது முகத்தை நெஞ்சில் பச்சைக்குத்திக்கொள்வது ஒரு ஃபாஷனாகிவிட்டது. மராடோனாவிற்கும், மைக் டைசனுக்கும் 'சே' ஒரு மலிவு விளம்பரமாகிவிட்டார். 'என் தந்தையின் வாழ்க்கைத் தத்துவத்தையும், எல்லா ஒழுக்கச் சிதைவுகளுக்கும் ஆளாகும் மக்களின்பால் அவர் கொண்ட தீராத நேசத்தையும் சற்று பாருங்கள்' என அலேய்டா குவேரா (சே-யின் மகள்) கூறுவது இன்றைய நிலையை தெளிவுர காட்டுகிறது. சுயநலவாதிகள் 'சே'யின் கொள்கைகளை புறந்தள்ளிவிட்டு பொருளீட்டலுக்கு மட்டுமே அவரை பயன்படுத்திக் கொண்டு விட்டனர்.

எனினும் 'சே'-ன் போராட்டம் முடிந்துவிட்டது, அது ஒரு பழைய, உயிரற்ற போராட்டம் என்று கூறிச் சென்று விட இயலுமா? உலகின் ஆக்கிரமிப்புச் சக்திகள் ஒன்றை நன்கு உணர்ந்து கொள்ள வேண்டும்; இளைஞர்களின் டி-சட்டைகளில் சிறைபடுத்தப்பட்டிருக்கும் 'சே'யின் கண்களில் உக்கிரமும், தீர்க்கமும் நிறைந்தே உள்ளது. புரட்சியாளனின் சிந்தனைகள் காலமாவதில்லை. சமூக நீதி புறக்கணிக்கப்படும், அடிப்படை உரிமைகள் மறுதலிக்கப்படும். எல்லா இடங்களிலும் வெடித்துக் கிளம்பும் மக்கள் சக்தியின் அடிநாதமாய் நிலை கொண்டிருப்பது 'சே' போன்ற புரட்சியாளர்களின் ஒப்பற்ற தியாகம்தான்.

வல்லினம் - கலை, இலக்கிய இதழ் | Vallinam - A Magazine For Arts And Literature
© vallinam.com.my | All Rights Reserved. 2009.  |  Designed by CVA | Best View in : Mozilla Firefox |  Best resolution : 1024 X 768