வல்லினம் - கலை, இலக்கிய இதழ் | Vallinam

இளங்கோவன் பதில்கள்
- இளங்கோவன்-

வல்லினம் வாசகர்களின் கேள்விகளுக்கு சிங்கை இளங்கோவன் தொடர்ந்து பதில் தருவார்.
கேள்விகளை editor@vallinam.com.my என்ற மின்னஞ்சலுக்கு அனுப்பி வைக்கலாம்.

அண்மையில் உங்களின் நாடகம் தடைப்பட்டதாக அறிகிறேன். என்ன காரணம்? உங்களுக்கு அந்நாடகம் ஏற்கனவே தடை செய்யப்படும் எனத் தெரியுமா?

மெக்லின்

நாடகம் தடைசெய்யப்படும் என்பதை எழுதும்போதே உணர்ந்தேன். முன்பு கலை நிர்வாகியாக இருந்தபோது தணிக்கைக் குழுசார்ந்த செயற்பாடுகள் எனக்கு அறிமுகமானவையே. அதனால், அதிகாரவர்க்க அடிமைகளின் தகிடுதத்தங்கள் பரிச்சயமே. கத்தோலிக்க திருச்சபையின் பதர்களை, காமப் பிசாசுகளை அம்பலப்படுத்தும் படைப்பு ஸ்டோமா. மதம் சார்ந்த, அதுவும் பொருளாதார பலமும், சர்வ வல்லமையும் படைத்த அமைப்பின் அசிங்கத்தைத் தோலுரித்துக்காட்ட சிங்கப்பூரில் எந்தப் படைப்பாளிக்கும் அறவே தைரியம் கிடையாது. நாற்பது பேர் கொண்ட அரசாங்க அடிவருடிகளைக் கொண்ட தணிக்கைக் குழு, நாடகம் கிறிஸ்துவர்களுக்கு எதிரானது என்று பொத்தாம் பொதுவிலான முத்திரையைக் குத்தி தடைவிதித்துவிட்டது. முறைப்படி, எந்த வரிகள் தனிக்கைகுரியவை என்று குறிப்பிடவில்லை. பதில் சொல்லவோ, விவாதிக்கவோ, தேவையான திருத்தங்களைச் செய்யவோ எனக்கு வாய்ப்பு வழங்காமல் இரவு எட்டு மணிக்கு வரச்சொல்லி, கையில், தடை என்று கடிதம் கொடுத்துவிட்டு ஒடி ஒளிந்து கொண்டார்கள் கோழைகள். இவர்களை எனக்கு நன்றாகத் தெரியும். மூன்று முறை தமிழில் வெற்றிகரமாக அரங்கேறிய தலாக் நாடகம் 2000-ல் ஆங்கிலத்தில் அரங்கேறும்போது முஸ்லீம்களின் மனம் புண்படும் என்றும், பதினொரு காரணங்கள் உண்டென்று நாடாளுமன்றத்தில் அறிவித்து எந்தக் காரணத்தையும் தெரிவிக்காமல் இன்றுவரை நிரந்தரத் தடைவிதித்த கோமாளிகள் தானே இவர்கள். 2006-இல் ஸ்மெக்மா நாடகத்துக்கு ஒரு சொல் கூட வெட்டாமல் அனுமதி வழங்கிய பின்னர் திடீரென்று நாடகம் அரங்கேறுவதற்கு ஒரு நாளுக்கு முன் தடைவிதித்த கோமாளிகள் தானே இவர்கள். ஸ்மெக்மா நாடகம் முஸ்லீம்களுக்கு எதிரானது என்று அப்பட்டமாகப் பொய்யுரைத்தவர்கள் தானே இவர்கள். இதில் வேடிக்கை என்னவென்றால் ஸ்மெக்மா நாடகத்தில் ஐந்து முஸ்லீம்கள் நடித்தார்கள். தலாக், ஸ்மெக்மா நூல்களுக்கு தடை இல்லை. ஆனால் நாடக அரங்கேற்றத்துக்கு என்றென்றும் தடை. தற்பொழுது ஸ்டோமா. சிங்கப்பூரில் மூன்று படைப்புகளுக்கு தடைவிதிக்கப்பட்ட ஒரே படைப்பாளி நான் தான். நல்லவேளை, அரசாங்கத்தை நக்கிப் பிழைக்கும் ஆங்கில, சீன, மலாய் முன்னணி எழுத்தாளர்களுக்கு மத்தியில், அதுவும் எச்சில் எலும்பு விருதுகளுக்கு அலையும் உள்ளூர் பிரபல தமிழ் இலக்கிய மலந்தின்னி நாய்கள் + தயிர்வடை இலக்கிய வந்தேறிகளின் பட்டியலில் இடம்பெறும் சாபக்கேட்டில் இருந்து தப்பித்தேன். ஜனநாயக முகமூடிதாரியான கேவலமான சிங்கப்பூர் அரசாங்கத்தின் இந்தத் தடை மசால் வடை எல்லாவற்றையும் துச்சமாகத் துப்புபவன் நான். சமூக குடும்ப நல்லொழுக்கம், கற்பு, இனமானம், தமிழின் அருமை பெருமை, மசிருமட்டை என்று புடுங்கிக்கொண்டிருக்கும் செந்தமிழ் மந்திகளைப் போல் சுயதணிக்கை செய்து பேதிக்குப்போகாமல், தடைகளைத் தாண்டி என் படைப்புகள் இன்னு��் தொடரும். மேன்மேலும் தடை செய்யப்படும்.

உங்கள் இயக்கத்தில் உங்களுக்குப் பிடித்த நாடகம் எது?

வரதன், இலங்கை

1992 - இல் சிங்கப்பூர்க் கலைவிழாவில் அரங்கேறிய ஊடாடி நாடகம். மலாயாவில் (மலேசியா, சிங்கப்பூர், இந்தோனேசியாவிலுள்ள மேடான்), ஒரு நூற்றாண்டு கால ஒடுக்குமுறைக்கு உள்ளான பறையர்களைப் பற்றிய (தலித் என்ற இரவல் பதம் தேவையில்லை என்று கருதுகிறேன்) நாடகம் ஊடாடி. இன்றுபோல் அன்று இணையம் கிடையாது. ஆறுமாதம், ஆய்வுகளுக்காக மிகவும் சிரமப்பட்டு நூல்களையும், ஆவணங்களையும் தேடிக் கண்டுபிடித்து தூக்கமின்றி இரத்தம் கொதிக்க எழுதிய நாடகம். நாடகம் அரங்கேறி முடிந்ததும் சிங்கப்பூர்த் தமிழ் சமூகத்தின் ஒழுக்கக் கரமைதுனக் காவலர்கள், அமைப்புகள், தமிழை உரசும் கக்கூஸ் நாளிதழ், உள்துறை இலாகா தமிழ் அதிகாரிகள் என பல்லக்குத் தூக்கிகள் அரசாங்கத்துக்கு ஓலை அனுப்பினார்கள். சிறுபான்மைத் தமிழினத்தைக் குஷிப்படுத்துவதற்காக, அப்போதை கலைகள் அமைச்சர் ஊடாடி நாடகத்திற்கு, இரகசியத் தடை விதித்தார். இருந்தும், 2003-இல் ஊடாடி நாடகத்தின் இருமொழி (தமிழ் + ஆங்கிலம்) நூலுக்கு சிங்கப்பூர் அனைத்துலக அறநிறுவனத்தின் விருது கிடைத்தது. ஊடாடி நூல் சென்னையில் வெளியீடு கண்டது. இருந்தும், இன்றுவரை, ஊடாடி நூலை சிங்கப்பூர் தேசிய நூலகத்திலோ, அதன் கிளை நூலகங்களிலோ நீங்கள் காண முடியாது. ஆய்வுக்கு மட்டும் என்று ஒரு பிரதி மட்டும் தேசிய நூலகத்தின் கட்டுப்படுத்தப்பட்ட பகுதியில் கிடைக்கும். இந்தத் தொண்டுக்காக நாம் நம் தேசிய நூலக தமிழ் கிஷ்கிந்தைவாசிகளுக்கு தேங்காய் உடைக்கவேண்டும். நான் மீண்டும் அரங்கேற்ற விரும்பும் நாடகம். அரங்கேற்றப் படாமலேயே போகட்டும். எனக்கொன்றும் இழப்பில்லை.

உங்கள் கருத்து/எதிர்வினை மற்றும் படைப்புக்களை editor@vallinam.com.my என்ற மின் அஞ்சல் முகவரிக்கு அனுப்பவும் | Back to Top