இன்று சீனாவுக்குப் புறப்படுகிறேன்.

சீனாவின் கலாசார, சுற்றுலாத் துறை அமைச்சும் ஜெஜியாங் மாநிலமும் இணைந்து லியான்ஸு கலாசார கருத்தரங்கு ஒன்றினை ஏற்பாடு செய்துள்ளது. அக்கருத்தரங்கில் கலந்துகொள்ள சீன அரசாங்கத்தின் அதிகாரத்துவ அழைப்பில், மலேசியாவிலிருந்து புறப்படும் இலக்கியக்குழுவில் நானும் இடம்பெற்றுள்ளேன் என்பதை மகிழ்ச்சியுடன் தெரிவித்துக்கொள்கிறேன்.

மலேசிய இலக்கியத்தில் ஈடுபட்டுள்ள தமிழ், மலாய், சீனமொழி எழுத்தாளர்கள் சீனாவுக்கு இப்படி ஓர் அதிகாரத்துவப் பயணத்தை மேற்கொள்வது நான் அறிந்து இதுவே முதல் முறை.

வெவ்வேறு நாடுகளைச் சேர்ந்த அறிஞர்கள், எழுத்தாளர்கள், கலைஞர்கள் ஒருவரையொருவர் தெரிந்துகொள்ளவும் அவர்களுக்கிடையே பண்பாட்டுப் பரிமாற்றத்தை ஏற்படுத்தவும் இந்தக் கருத்தரங்கு இரண்டாவது ஆண்டாக ஏற்பாடு செய்யப்பட்டுள்ளதை அழைப்பிதழ் வந்தபோது அறிந்து கொண்டேன். பயணம், தங்கும் வசதி, சுற்றுலா என அனைத்துக்கும் சீன அரசே பொறுப்பேற்றிருந்தது. ஆனால் டிசம்பர் 1, வல்லினம் இளம் எழுத்தாளருக்கான விருதளிப்பு விழாவை ஒட்டிய ஏற்பாடுகள் செய்ய வேண்டிய பொறுப்பு இருந்ததால் அழைப்பை ஏற்பதில் சிறிய தயக்கம் இருந்தது.

சீனா மற்றும் 63 நாடுகளைச் சேர்ந்த ஏறக்குறைய 100 அனைத்துலக கலைஞர்கள், எழுத்தாளர்கள், பல்கலைகழகங்கள் – கலை நிறுவனங்களில் தலைவர்கள், அமெரிக்கத் தேசிய அறிவியல் அகாடமியின் மூத்த உறுப்பினர்கள், பிரிட்டிஷ் அகாடமியின் உறுப்பினர்கள் என பலரும் பங்கேற்கின்றனர் போன்ற தகவல்கள் பயணத்திற்கான ஆர்வத்தை உண்டாக்கியது.

எல்லாவற்றுக்கும் மேலாக, இக்கருத்தரங்கு சீனாவின் மிகத் தொன்மை நகரமான லியான்ஸு (Liangzhu) தொல்பொருள் இடிபாடுகள் உள்ள, ஜெஜியாங் மாநிலத்தின்  ஹாங்சாவ் (hangzhou) நகரில் ஏற்பாடு செய்யப்பட்டிருந்தது. எனவே, வல்லினம் நண்பர்களிடம் பொறுப்புகளைப் பகிர்ந்தளித்துவிட்டு பயணத்தை உறுதி செய்தேன். ஊர் சுற்றுவதும் எழுத்தாளன் ஆற்ற வேண்டிய இணைப்பணி அல்லவா!

ஜெஜாங் பல்கலைக்கழகத்தின் ஏற்பாட்டில்,  நவம்பர் 25ஆம் தேதி  முதல் 27ஆம் தேதி வரை இக்கருத்தரங்கு நடைபெறுகிறது. ‘இரண்டாவது லியான்ஸு கலாசார கருத்தரங்கு; பிற நாகரிகங்களுடன் பரஸ்பரம் அறிந்துகொள்ளுதல், மனித மேம்பாட்டின் புதிய வடிவம்’ (exchange and mutual learning for a new era of human civilization) என்பது கருத்தரங்கின் தலைப்பு. 

இக்கருத்தரங்கின் துணை நிகழ்வான இலக்கியக் கலந்துரையாடலில் நாங்கள் கலந்துகொள்கிறோம். நாங்கள் என்பது, நான், மலாய் மொழி எழுத்தாளர் அஸ்ரின் ஃபௌஸி (Azrin Fauzi), முனைவர் சாய் சியாவ் லிங் (DR. CHAI SIAW LING), இணை பேராசிரியர் முனைவர் ஃபன் பிக் வா (Dr. Fan Pik Wah) ஆகிய நால்வர்.

லியான்ஸு, யுனெஸ்கோவினால் உலக மரபுடைமைப் பகுதியாக அறிவிக்கப்பட்டுள்ள இடம். யங்ஸே ஆற்றோரத்து நாகரிகமான லியான்ஸு ஆசியாவில் வரலாற்றுக்கு முந்தைய பெரிய அளவிலான குடியேற்றப் பகுதியின் சின்னமாக, மனித நாகரிகத்தின் வளர்ச்சியின் வரலாற்றில் குறிப்பிடத்தக்க  ஆவணமாக உள்ளது. 

கிட்டத்தட்ட 5,300 ஆண்டுகள் பழமையான இந்த நகரம் 1936இல் திரு. ஷி ஜிங்கெங் என்பதால் கண்டுபிடிக்கப்பட்டது. பல ஆண்டுகாலமாகத் தொடரும் தொல்பொருள் அகழ்வாராய்ச்சிகளில் அண்மையில் கண்டறியப்பட்ட   அணைகள் உட்பட 350க்கும் மேற்பட்ட தளங்கள் இப்பகுதியில் அடையாளம் காணப்பட்டுள்ளன. 2019 இதை உலக மரபுடைத்தளமாக யுனெஸ்கோ அறிவித்தது.

கிழக்கு சீனாவின் ஜெஜியாங் மாகாணத்தில் அமைந்துள்ள லியான்ஸு,  இடிபாடுகள், சீன நாகரிகம் குறைந்தது 5,000 ஆண்டுகளுக்கு முன்னரே செழித்திருந்ததற்கான  சாட்சியமாக உலகின் அங்கீகாரத்தைப் பெற்றுள்ளது.

தொன்மையும் செழிப்பும் மிக்க, சீனத்தின் நவீன கற்காலத்தின் ஜேட் கலாசாரத்தின் எச்சம் அந்தப் பகுதி. ஜேட் கல், தந்தம், லாக்கர் வேலைப்பாடுகளுக்கும் பெயர்பெற்ற கலாசாரம்.

முறையான நீர்பாசனம், நெல் விவசாயம் என்று மேம்பட்ட விவசாயத்திற்கும் லியான்ஸு மக்கள் பெயர்பெற்றிருந்தனர். குறிப்பாக, சீன நாகரிகத்தின் தொடக்ககாலத்திலேயே நெல் விவசாயத்தில் சாதனை படைக்கப்பட்டுள்ளதற்கு சாட்சியாக அப்பகுதி உள்ளது. ஆற்றிலும் கரையோரங்களிலும் கம்புகளை நட்டு அதன் மேல் வீடுகள் கட்டி வாழ்ந்த அந்த மக்கள் கைவினையோடு இலக்கியமும் அறிந்தவர்களாக இருந்துள்ளனர்.

கி.மு.2500ஆம் ஆண்டு வாக்கில் மிகவும் செழித்திருந்த லியான்ஸு கலாசாரம், கி.மு.2300ஆம் ஆண்டு வாக்கில் அப்படியே மறைந்துவிட்டது. அந்தப் பகுதியில் பல தடவை நீர்மட்டம் உயர்ந்து வெள்ளம் ஏற்பட்டத்தில் குடியேற்ற வளர்ச்சியைத் தடைசெய்துள்ளதாக ஆய்வுகள் தெரிவிக்கின்றன.

இத்தகைய மிகத் தொன்மையான நாகரிகம் செழிந்திருந்த பகுதியில், பல இன மக்களுடன் இலக்கியம் பேசவும் மலேசியத் தமிழ் இலக்கியம் குறித்துப் பகிர்ந்துகொள்ளவும் கிடைத்துள்ள இந்த வாய்ப்பை மலேசியத் தமிழ் இலக்கியத்துக்குக் கிடைத்துள்ள சிறப்பாகவே கருதுகிறேன்.

மாநாடு முடிந்து நவம்பர் 28 மலேசியா திரும்புகிறேன். அன்றுதான் வல்லினம் விழாவுக்காக தமிழக எழுத்தாளர்களும் மலேசியா வருகிறார்கள். நவம்பர் 30 இலக்கியப் பட்டறை. அடுத்த நாள் விழா. இரண்டு ஆண்டுகளுக்கு முன்னர் கூட இவ்வளவு சாவகாசமாக ஒரு விழாவை ஏற்பாடு செய்ததில்லை. இன்று வல்லினம் நண்பர்கள் உடனிருக்கும் பலம் அனைத்தையும் இலகுவாக்கியுள்ளது.

40 வயதை கடந்துவிட்டால் மூத்த எழுத்தாளராகிவிடலாம் போல. மூத்த எழுத்தாளனுக்கு உரிய உரிமையுடன் நண்பர்களிடம் பணிகளைப் பகிர்ந்தளிக்க முடிகின்றது. எல்லாவற்றையும் அவர்கள் பார்த்துக்கொள்வார்கள் என்ற நம்பிக்கையுடன் புறப்படுகிறேன்.